پاکستانی برآمدات میں جولائی 2025 کے دوران 16 فیصد اضافہ، ٹیکسٹائل سیکٹر نمایاں

اسلام آباد…رواں مالی سال 2025-26 کے پہلے ماہ (جولائی 2025) میں پاکستان کی برآمدات میں نمایاں اضافہ ریکارڈ کیا گیا۔ وفاقی ادارہ شماریات کے مطابق جولائی میں برآمدات 16.43 فیصد بڑھ کر 2 ارب 68 کروڑ ڈالر تک پہنچ گئیں۔اعداد و شمار کے مطابق ٹیکسٹائل سیکٹر نے برآمدات میں سب سے زیادہ حصہ ڈالا۔ ٹیکسٹائل ایکسپورٹس 32 فیصد اضافے سے ایک ارب 67 کروڑ ڈالر تک پہنچ گئیں۔ اس دوران ریڈی میڈ گارمنٹس، سوتی دھاگا، کپڑے، نیٹ ویئر، بیڈویئر اور ٹاولز کی برآمدات میں نمایاں اضافہ ہوا۔ تاہم ٹینٹ، کینوس اور ترپال کی ایکسپورٹ میں کمی ریکارڈ کی گئی۔غذائی اجناس کی برآمدات میں 10.25 فیصد کمی دیکھنے میں آئی، جس کا حجم 42 کروڑ 69 لاکھ ڈالر رہا، جبکہ گزشتہ سال اسی مدت میں یہ 47 کروڑ 57 لاکھ ڈالر تھیں۔ باسمتی چاول، سبزیوں، آئل سیڈز اور چینی کی برآمدات میں کمی ہوئی، لیکن پھلوں، مسالہ جات، گوشت اور اس کی مصنوعات کی برآمدات میں اضافہ دیکھا گیا۔رپورٹ کے مطابق آٹو پارٹس، لیدر مصنوعات اور سرجیکل آلات کی ایکسپورٹ میں بھی اضافہ ہوا۔ تاہم پلاسٹک میٹریل، ادویات اور ٹرانسپورٹ کے سامان کی برآمدات میں کمی ریکارڈ کی گئی۔ پیٹرولیم اور کوئلے کی برآمدات 23.37 فیصد کمی کے ساتھ 4 کروڑ 88 لاکھ ڈالر رہیں۔مجموعی طور پر مخصوص صنعتوں کی برآمدات میں سالانہ بنیاد پر 17.35 فیصد کمی دیکھی گئی، تاہم ٹیکسٹائل اور دیگر شعبوں کی بہتر کارکردگی کی بدولت پاکستان کی مجموعی برآمدات جولائی میں نمایاں طور پر بہتر رہیں۔