عالمی بینک پاکستان کو 2 ارب ڈالر سے زائد قرض فراہم کرے گا

اسلام آباد… عالمی بینک پاکستان کو رواں مالی سال مختلف ترقیاتی منصوبوں کے لیے 2 ارب ڈالر سے زائد کا قرض فراہم کرے گا۔ اقتصادی امور ڈویژن کے مطابق یہ فنڈنگ انٹرنیشنل ڈیولپمنٹ ایسوسی ایشن (IDA) اور انٹرنیشنل بینک فار ری کنسٹرکشن اینڈ ڈویلپمنٹ (IBRD) کے ذریعے دی جائے گی۔سرکاری دستاویز کے مطابق پاکستان میں عالمی بینک کے ذریعے 57 منصوبوں پر کام جاری ہے، جن کی مجموعی لاگت 16.6 ارب ڈالر ہے۔ ان منصوبوں کا تعلق زراعت، پانی، توانائی، فنانس، ریونیو، مواصلات، شہری و دیہی ترقی، ہیومین کیپیٹل، سوشل سروسز اور گورننس سے ہے۔اقتصادی امور ڈویژن نے بتایا کہ عالمی بینک نے گزشتہ 7 سال میں پاکستان کو مجموعی طور پر 11.84 ارب ڈالر فراہم کیے، جس میں سب سے زیادہ 1.96 ارب ڈالر توانائی کے شعبے کے لیے دیے گئے۔ گزشتہ مالی سال ایک ارب 80 کروڑ ڈالر قرض فراہم کیا گیا جبکہ رواں مالی سال 2 ارب ڈالر سے زائد فنڈز فراہم کیے جائیں گے۔ماہرین کے مطابق عالمی بینک کی یہ فنڈنگ ملک میں بنیادی ڈھانچے اور سماجی ترقی کے منصوبوں کو مزید مستحکم کرے گی، اور پاکستان کی معیشت میں بہتری کے امکانات بڑھائے گی۔