بھارتی پنجاب میں مون سون سیلاب: 30 ہلاک، 3 لاکھ متاثر اور 1,400 دیہات زیرِ آب

ممبئی …بھارتی پنجاب،مون سون بارشوں اور شدید سیلاب کے باعث پنجاب میں ہولناک صورتحال پیدا ہوگئی ہے، جہاں مختلف حادثات میں کم از کم 30 افراد ہلاک اور 3 لاکھ 54 ہزار متاثر ہوئے ہیں۔میڈیا رپورٹس کے مطابق تقریبا 1,400 دیہات زیرِ آب آچکے ہیں، جب کہ 20 ہزار سے زائد افراد کو خطرناک علاقوں سے نکالا گیا اور متاثرہ خاندانوں کے لیے سیکڑوں امدادی کیمپ قائم کیے گئے ہیں۔انتظامیہ نے ریاست کے تمام 23 اضلاع کو سیلاب زدہ قرار دے دیا ہے اور ندیوں و آبی ذخائر میں خطرناک حد تک پانی کے بہا میں اضافہ ریکارڈ کیا گیا ہے۔ تقریبا ایک لاکھ 48 ہزار ایکڑ زرعی اراضی پر فصلوں کو شدید نقصان پہنچا ہے۔پنجاب کے وزیر اعلی نے اس سیلاب کو 1988 کے بعد سب سے شدید قرار دیا ہے اور متاثرین کی مدد کے لیے ہنگامی اقدامات کی ہدایت کی ہے۔