قدرتی آفات سے بچاؤ کے لیے محفوظ گھروں کی تعمیر میں سرمایہ کاری ناگزیر، اقوام متحدہ

نیویارک( مانیٹرنگ ڈیسک) اقوام متحدہ نے قدرتی آفات کے تباہ کن اثرات سے بچنے کے لیے محفوظ اور مضبوط رہائش گاہوں کی تعمیر میں سرمایہ کاری بڑھانے پر زور دیتے ہوئے اسے ناگزیر قرار دیا ہے۔عالمی ذرائع ابلاغ کے مطابق اقوام متحدہ کے سیکرٹری جنرل انتونیو گوتریس نے کہا ہے کہ قدرتی آفات کے باعث ہر سال مکانات کو 228 ارب ڈالر کا نقصان پہنچتا ہے، جس کے پیش نظر ایسی رہائش گاہیں تعمیر کرنے کی ضرورت ہے جو آفات کا مقابلہ کرنے کی صلاحیت رکھتی ہوں۔قدرتی آفات کے خطرات میں کمی کے عالمی دن کے موقع پر اپنے پیغام میں انتونیو گوتریس نے کہا کہ موسمیاتی تبدیلیوں اور قدرتی آفات کے بڑھتے ہوئے خطرات کے تناظر میں محفوظ گھروں کی تعمیر حکومتوں، تعمیراتی اداروں، انجینئرز اور مقامی آبادیوں کی مشترکہ ذمہ داری ہے۔اقوام متحدہ کے شعبہ برائے تخفیفِ آفات کے مطابق سمندری طوفانوں، سیلاب، سونامی اور زلزلوں سے ہونے والے براہِ راست نقصانات میں مکانات کو پہنچنے والے نقصان کا حصہ 43 فیصد ہے۔ادارے کی ترجمان جینیٹ ایلس ورتھ نے کہا کہ قدرتی آفات سے ہونے والی تباہی کم کرنے کے لیے مضبوط مکانات کی تعمیر کے ساتھ خاندانوں کو ہنگامی حالات سے نمٹنے کے لیے تیار کرنا بھی ضروری ہے۔عالمی رسک پول 2026 کی رپورٹ کے مطابق قدرتی آفت سے متعلق پیشگی انتباہ ملنے پر ایسے افراد میں سے صرف 27 فیصد نے عملی اقدامات کیے جن کے پاس ہنگامی منصوبہ موجود نہیں تھا، جبکہ منصوبہ بندی کرنے اور اپنی صلاحیتوں پر اعتماد رکھنے والے افراد میں یہ شرح 83 فیصد رہی۔عالمی ادارہ برائے مہاجرت کے مطابق ادارے نے 2025 میں 39 ممالک کی تقریباً 1,200 برادریوں میں 14 لاکھ افراد کو قدرتی آفات کے خطرات کم کرنے کے پروگراموں کے تحت معاونت فراہم کی۔ اس کے علاوہ 12 لاکھ سے زائد افراد تک پیشگی انتباہی نظام کی رسائی بڑھانے میں بھی مدد دی گئی۔ادارے کی عہدیدار ماریا موئٹا نے کہا کہ قدرتی آفت گزر جانے کے بعد بھی متاثرہ افراد کی مشکلات ختم نہیں ہوتیں، بلکہ انہیں گھروں اور روزگار کی بحالی اور معمولاتِ زندگی کی طرف واپسی کے لیے طویل جدوجہد کرنا پڑتی ہے۔ انہوں نے نیپال، وینزویلا اور کولمبیا کی مثالیں دیتے ہوئے کہا کہ بروقت منصوبہ بندی اور درست معلومات کی فراہمی متاثرہ علاقوں کی بحالی میں اہم کردار ادا کرتی ہے۔ماریا موئٹا نے حکومتوں اور متعلقہ اداروں پر زور دیا کہ محفوظ مقامات پر تعمیرات، مضبوط تعمیراتی معیار پر عمل درآمد، موجودہ مکانات کی بہتری، پیشگی انتباہی نظام اور مقامی سطح پر ہنگامی تیاری کے لیے مستقل سرمایہ کاری یقینی بنائی جائے۔