استنبول کا تاریخی یدی قلعہ دروازہ، بازنطینی اور عثمانی دور کی یادگار

استنبول( تر کیہ خبر) ترکی کے شہر استنبول میں واقع تاریخی یدی قلعہ دروازہ اپنے قدیم طرزِ تعمیر اور صدیوں پر محیط مرمت کے آثار کے ذریعے بازنطینی اور عثمانی ادوار کی تاریخ محفوظ کیے ہوئے ہے۔ یہ دروازہ شہر کی قدیم زمینی فصیل کے جنوبی حصے میں بحیرہ مرمرہ کے قریب واقع ہے۔خبر رساں ادارے اناطولو کی تاریخی سلسلہ وار رپورٹ کی نویں قسط میں اس دروازے کو شامل کیا گیا ہے، جس کا مقصد استنبول کی تاریخ سے جڑے اہم دروازوں اور تاریخی مقامات کو اجاگر کرنا ہے۔ یہ دروازہ یدی قلعے کے قریب اور گولڈن گیٹ کے شمال میں واقع ہے۔قدیم فصیل کے برج نمبر 11 اور 12 کے درمیان موجود اس دروازے میں نوکیلی محراب نمایاں ہے، جسے اینٹوں کی دو تہوں سے تعمیر کیا گیا تھا۔ اس پر عثمانی سلطان احمد سوم کے دورِ حکومت سے تعلق رکھنے والی مرمت کی ایک تحریر بھی موجود ہے۔اس وقت فصیل کی مرکزی دیوار سے گزرنے والا راستہ باقی ہے، جبکہ بیرونی حصے میں موجود دوسرا راستہ ختم ہو چکا ہے۔تاریخی ریکارڈ کے مطابق سلطان احمد سوم اور سلطان عثمان سوم کے ادوار میں دروازے اور اس کے گرد موجود فصیل کی مرمت کی گئی، جو عثمانی دور میں بھی اس مقام کے مسلسل استعمال کی عکاسی کرتی ہے۔ماضی میں یہ دروازہ شہر کی فصیل کے اندرونی حصے کو یدی قلعے کے اطراف کے علاقوں سے ملاتا تھا۔ آج بھی یہ استنبول کے بازنطینی اور عثمانی طرزِ تعمیر کے اہم تاریخی ورثے میں شمار ہوتا ہے۔استنبول مدنیت یونیورسٹی کے شعبہ تاریخِ فن کے پروفیسر قادر پیکتاش نے خبر رساں ادارے اناطولو کو بتایا کہ یدی قلعہ دروازہ استنبول کی قدیم زمینی فصیل کے جنوبی سرے کے قریب واقع ہے، جو آگے بحیرہ مرمرہ کی سمت پھیلی ہوئی ہے۔