ترکی میں عالمی ماحولیاتی کانفرنس کی تیاریاں، آسٹریلیا اور اقوام متحدہ سے مشاورت

استنبول( تر کیہ خبر) ترکی کے وزیر ماحولیات، شہری منصوبہ بندی اور موسمیاتی تبدیلی مراد کورم نے آسٹریلیا کے وزیر موسمیاتی تبدیلی و توانائی کرس بوون اور اقوام متحدہ کے موسمیاتی سربراہ سائمن اسٹیل سے آن لائن ملاقات کی، جس میں آئندہ ماہ ترکی میں ہونے والی عالمی ماحولیاتی کانفرنس کی تیاریوں پر تبادلہ خیال کیا گیا۔مراد کورم، جو اقوام متحدہ کی موسمیاتی کانفرنس کوپ 31 کے صدر بھی ہیں، نے سماجی رابطے کی ویب سائٹ پر بتایا کہ ملاقات میں کانفرنس کے انتظامات کے ساتھ اس کے عملی اقدامات کے ایجنڈے کا بھی جائزہ لیا گیا۔انہوں نے کہا کہ آسٹریلوی وزیر کرس بوون اور اقوام متحدہ کے ماحولیاتی تبدیلی سے متعلق فریم ورک کنونشن کے ایگزیکٹو سیکرٹری سائمن اسٹیل کے ساتھ ہونے والی آن لائن گفتگو مفید رہی اور اس میں کانفرنس کی تیاریوں پر تفصیلی تبادلہ خیال کیا گیا۔مراد کورم نے اس بات پر زور دیا کہ کانفرنس کے نتائج کو مؤثر بنانے کے لیے تمام فریقوں کے ساتھ قریبی تعاون ضروری ہے، تاکہ مختلف نقطہ ہائے نظر اور تجاویز کو فیصلوں میں شامل کیا جا سکے۔انہوں نے کہا کہ ترکی کا مقصد باہمی اشتراک کے ذریعے تمام متعلقہ فریقوں کو مشاورت میں شامل کرنا اور مختلف آرا سے فائدہ اٹھاتے ہوئے کوپ 31 کے نتائج کو بہتر بنانا ہے۔