برطانیہ میں دو ٹرینوں کا تصادم، ایک ڈرائیور ہلاک، 33 افراد زخمی

 لندن( مانیٹرنگ ڈیسک)برطانیہ میں دو ٹرینوں کے درمیان تصادم کے نتیجے میں ایک ڈرائیور ہلاک جبکہ کم از کم 33 افراد زخمی ہو گئے ہیں۔میڈیا رپورٹس کے مطابق حادثے کے فوراً بعد امدادی ٹیمیں، فائر بریگیڈ اور طبی عملہ موقع پر پہنچ گیا اور ریسکیو آپریشن شروع کر دیا گیا۔ابتدائی معلومات کے مطابق حادثہ اس وقت پیش آیا جب ایک مسافر ٹرین اور دوسری ریل گاڑی ایک ہی ٹریک پر آ گئیں، جس کے باعث شدید ٹکر ہوئی۔حادثے میں ڈرائیور موقع پر ہی جان کی بازی ہار گیا جبکہ متعدد مسافر زخمی ہوئے، جن میں بعض کی حالت تشویشناک بتائی جا رہی ہے۔عینی شاہدین کے مطابق تصادم کے بعد کئی بوگیاں پٹری سے اتر گئیں، جس سے مسافروں میں خوف و ہراس پھیل گیا۔ریسکیو اہلکاروں نے زخمیوں کو قریبی اسپتالوں میں منتقل کر دیا ہے، جبکہ ریلوے حکام نے متاثرہ روٹ پر ٹرین سروس عارضی طور پر معطل کر دی ہے۔