شام میں اسرائیلی حملہ، اسرائیل ترکیہ کشیدگی بڑھ گئی

تل ابیب/انقرہ( مانیٹرنگ ڈیسک) شام کے ایک ایئربیس پر اسرائیلی حملے کے بعد اسرائیل اور ترکیہ کے درمیان کشیدگی میں اضافہ ہوگیا ہے۔اسرائیل نے ترکیہ پر الزام عائد کیا ہے کہ وہ شام کے ایک فوجی اڈے پر اپنے فوجی تعینات کرنے کی تیاری کر رہا تھا، جسے اسرائیل نے اپنی سلامتی کے لیے خطرہ قرار دیا ہے۔اسرائیلی وزیراعظم بنیامین نیتن یاہو کے دفتر کے مطابق اسرائیل اور شام نے سکیورٹی معاملات میں موجودہ صورتحال برقرار رکھنے پر اتفاق کیا تھا، تاہم حلب کے قریب ایک ایئربیس پر ترک فوجیوں کی ممکنہ تعیناتی اس سمجھوتے کی خلاف ورزی کے قریب پہنچ گئی تھی۔اسرائیل کا کہنا ہے کہ اس نے شام کو کئی مرتبہ خبردار کیا تھا کہ ترک فوجیوں کی تعیناتی اسرائیلی سلامتی کے لیے خطرہ بن سکتی ہے، لیکن شامی حکومت نے ان انتباہات کو نظر انداز کیا۔دوسری جانب ترکیہ نے اسرائیلی الزامات مسترد کرتے ہوئے کہا ہے کہ وہ شام کے کسی ایئربیس پر فوجی تعینات کرکے اسرائیل کے لیے خطرہ پیدا کرنے کی تیاری نہیں کر رہا تھا۔امریکا نے بھی اسرائیل کے اس اقدام پر تنقید کرتے ہوئے حملے کی ذمہ داری اپنے اتحادی اسرائیل پر عائد کی ہے۔ تازہ صورتحال خطے میں اسرائیل، ترکیہ اور شام کے درمیان بڑھتی ہوئی کشیدگی کی عکاسی کرتی ہے۔