سلوواکیہ نے روسی شہریوں کی نئی ویزا درخواستیں معطل کر دیں

سلوواکیہ( مانیٹرنگ ڈیسک) سلوواکیہ کی حکومت نے روسی شہریوں کی نئی ویزا درخواستوں کو عارضی طور پر روکنے کا اعلان کر دیا ہے۔میڈیا رپورٹس کے مطابق سلوواکیہ حکام کا کہنا ہے کہ یہ فیصلہ یورپی یونین کی مشترکہ سلامتی پالیسی اور روس سے متعلق بڑھتے ہوئے سیکیورٹی خدشات کے پیش نظر کیا گیا ہے۔حکام کے مطابق اس فیصلے کے تحت روسی شہریوں کی نئی ویزا درخواستیں فی الحال وصول نہیں کی جائیں گی، تاہم انسانی ہمدردی کے معاملات، قریبی خاندانی وجوہات یا دیگر غیر معمولی صورتحال میں مخصوص درخواستوں کے لیے الگ طریقہ کار برقرار رکھا جا سکتا ہے۔یہ اقدام ایسے وقت میں سامنے آیا ہے جب یورپی یونین پہلے ہی روسی شہریوں کے لیے ویزا قوانین سخت کر چکی ہے۔ 2022 میں روس کے ساتھ ویزا سہولت معاہدہ معطل کیا گیا تھا، جبکہ بعد ازاں روسی شہریوں کے لیے طویل المدتی اور متعدد بار داخلے والے ویزوں پر بھی پابندیاں عائد کی گئیں، جس کے باعث ویزا کے حصول کا عمل مزید پیچیدہ ہو گیا۔سلوواکیہ حکومت کے مطابق اس فیصلے کا مقصد ملکی سلامتی کا تحفظ اور یورپی شینگن نظام کے تحت ویزا درخواستوں کی زیادہ سخت جانچ کو یقینی بنانا ہے۔