شارجہ میں عالمی کتب خانہ کانفرنس شروع، 16 ممالک کے 400 ماہرین شریک

شارجہ (مانیٹرنگ ڈیسک) متحدہ عرب امارات کی ریاست شارجہ میں 13ویں عالمی کتب خانہ کانفرنس کا باقاعدہ آغاز ہوگیا، جس میں 16 ممالک سے تعلق رکھنے والے 400 ماہرینِ کتب خانہ، ماہرین تعلیم، محققین اور علمی اداروں کے نمائندے شرکت کر رہے ہیں۔اس عالمی اجتماع میں مصنوعی ذہانت، ڈیجیٹل ٹیکنالوجی، طلبہ کی پیشہ ورانہ مہارتوں اور مستقبل کے کتب خانوں سے متعلق امور کو خصوصی اہمیت دی جارہی ہے۔ شارجہ بک اتھارٹی اور امریکی کتب خانہ ایسوسی ایشن کے مشترکہ تعاون سے منعقد ہونے والی یہ کانفرنس 45ویں شارجہ عالمی کتب میلے کے سلسلے میں منعقد کی جارہی ہے۔افتتاحی تقریب میں شارجہ بک اتھارٹی کے چیف ایگزیکٹو احمد بن رکاض العامری شریک ہوئے، جبکہ امریکی کتب خانہ ایسوسی ایشن کی سابق صدر سام ہلمک نے برقی رابطے کے ذریعے خطاب کیا۔احمد بن رکاض العامری نے اپنے خطاب میں کہا کہ کتب خانوں نے انسانی تہذیب کی تشکیل، علم و تحقیق کے فروغ اور نسل در نسل علمی ورثے کی منتقلی میں ہمیشہ بنیادی کردار ادا کیا ہے۔ان کا کہنا تھا کہ نئی نسل کو صرف ماضی کا علم منتقل کرنا کافی نہیں، بلکہ نوجوانوں میں معلومات کا تنقیدی جائزہ لینے، تحقیق کرنے اور علم کے نئے میدان دریافت کرنے کی صلاحیت بھی پیدا کرنا ضروری ہے۔کانفرنس کے مختلف اجلاسوں میں مصنوعی ذہانت کے بڑھتے ہوئے استعمال، ڈیجیٹل معلومات کی صداقت اور قارئین کو مستند علمی مواد تک رسائی فراہم کرنے جیسے موضوعات پر تفصیلی تبادلہ خیال کیا گیا۔سام ہلمک نے اپنے خطاب میں کہا کہ موجودہ ڈیجیٹل دور میں معلومات کی غیر معمولی فراوانی اور خودکار نظاموں کے بڑھتے ہوئے اثرات نے کتب خانوں کی ذمہ داریوں میں مزید اضافہ کردیا ہے۔ انہوں نے معلومات تک یکساں رسائی، قارئین کی نجی معلومات کے تحفظ اور مختلف نظریات سے آگاہی کی اہمیت پر بھی زور دیا۔مصر کی اسکندریہ لائبریری کی نمائندہ ہاجر نجدی نے مصنوعی ذہانت کے حوالے سے عوامی شعور اجاگر کرنے کے تجربات بیان کرتے ہوئے کہا کہ نئی ٹیکنالوجی کا استعمال سکھانا ہی کافی نہیں، بلکہ اس سے حاصل ہونے والے نتائج کی صحت جانچنے اور اس کے اخلاقی تقاضوں کو سمجھنے کی تربیت دینا بھی ناگزیر ہے۔