اسرائیل میں نئی پارلیمنٹ کا حلف، حکومت سازی کا مرحلہ تاحال تعطل کا شکار

تل ابیب (مانیٹرنگ ڈیسک) اسرائیل میں عام انتخابات کے بعد نئی پارلیمنٹ نے حلف اٹھا لیا ہے، تاہم سیاسی جماعتوں کے درمیان مطلوبہ حمایت حاصل نہ ہونے کے باعث نئی حکومت کی تشکیل اب تک ممکن نہیں ہوسکی۔انتخابی نتائج کے مطابق وزیراعظم بنیامین نیتن یاہو پارلیمانی اکثریت حاصل کرنے میں ناکام رہے، جبکہ ان کے مخالف سابق فوجی سربراہ گادی آئزن کوٹ بھی حکومت بنانے کے لیے درکار نشستیں حاصل نہیں کرسکے۔اسرائیلی صدر اسحاق ہرزوگ نے گادی آئزن کوٹ کو حکومت تشکیل دینے کی ذمہ داری سونپی ہے۔ ان کی جماعت اور اتحادیوں کو 120 رکنی پارلیمنٹ میں 48 نشستیں حاصل ہیں، جبکہ نیتن یاہو کے سیاسی اتحاد کے پاس 53 نشستیں ہیں۔دوسری جانب عرب جماعتوں نے 19 نشستیں حاصل کی ہیں اور وہ نیتن یاہو کی مخالفت کرتی ہیں، جس کے باعث آئزن کوٹ کو ان کی ممکنہ حمایت ملنے کی توقع ہے۔صدر اسحاق ہرزوگ نے پارلیمنٹ کے ارکان پر زور دیا ہے کہ وہ سیاسی اختلافات بالائے طاق رکھ کر اتفاق رائے پیدا کریں اور ملک کو ایک بار پھر انتخابات کی جانب جانے سے بچائیں۔ادھر بنیامین نیتن یاہو نے تمام بڑی سیاسی جماعتوں پر مشتمل قومی اتحادی حکومت قائم کرنے کی تجویز پیش کی ہے۔ انہوں نے ایران کے جوہری پروگرام کو اسرائیل کے لیے سنگین خطرہ قرار دیتے ہوئے قومی سطح پر اتحاد کی ضرورت پر زور دیا۔