سعودی دفاعی نظام نے ریاض کی جانب آنے والے 3 میزائل تباہ کر دیے

ریاض (مانیٹرنگ ڈیسک) سعودی عرب کے فضائی دفاعی نظام نے دارالحکومت ریاض کی جانب داغے گئے ایک کروز میزائل اور ایک بیلسٹک میزائل کو فضا ہی میں تباہ کر دیا، جبکہ ملک کے جنوبی علاقے میں بھی ایک بیلسٹک میزائل مار گرایا گیا۔یمن میں آئینی حکومت کی بحالی کے لیے قائم عرب اتحاد کے ترجمان میجر جنرل ترکی المالکی نے سماجی رابطے کی ویب سائٹ پر جاری بیان میں بتایا کہ ریاض اور جنوبی علاقے کی طرف آنے والے میزائلوں کو بروقت روک کر تباہ کر دیا گیا۔دوسری جانب سعودی شہری دفاع نے ریاض، ابہا اور خمیس مشیط میں ممکنہ خطرے کے پیش نظر ہنگامی انتباہ جاری کیا، تاہم کچھ دیر بعد یہ اطلاع واپس لے لی گئی۔ میزائل حملوں کا یہ واقعہ ایسے وقت پیش آیا ہے جب یمن کی حوثی ملیشیا کی جانب سے سعودی عرب کو نشانہ بنانے کی کوششیں جاری ہیں۔ایران کی حمایت یافتہ حوثی ملیشیا ماضی میں سعودی عرب کے ہوائی اڈوں اور توانائی کے بنیادی ڈھانچے سمیت مختلف شہری تنصیبات پر حملے کرتی رہی ہے۔سعودی وزارت توانائی کے مطابق اس سے قبل مدینہ کے علاقے میں مشرقی مغربی تیل کی پائپ لائن کو بھی نشانہ بنایا گیا تھا، جس کے نتیجے میں محدود پیمانے پر آگ بھڑک اٹھی۔ ہنگامی امدادی ٹیموں نے فوری کارروائی کرتے ہوئے آگ پر قابو پالیا۔ واقعے میں کوئی شخص جاں بحق یا زخمی نہیں ہوا اور پائپ لائن کا عملی نظام بھی معمول کے مطابق کام کرتا رہا۔عرب اتحاد نے مزید دعویٰ کیا ہے کہ یمن میں حوثی ملیشیا کے بیلسٹک میزائلوں کی تیاری اور انہیں جوڑنے والی 3 اہم تنصیبات تباہ کر دی گئی ہیں۔اتحاد کے ترجمان میجر جنرل ترکی المالکی کے مطابق کارروائی میں بیلسٹک میزائلوں کی تیاری اور جوڑنے والی فیکٹری، ٹھوس ایندھن تیار کرنے اور ملانے والا کیمیائی کارخانہ اور میزائلوں کے برقی نظام کی تیاری سے متعلق ورکشاپ کو نشانہ بنا کر تباہ کیا گیا۔