یورپ کا نیا سکیورٹی فورم بنانے کی تجویز، برطانیہ اور کینیڈا بھی شامل

برسلز( مانیٹرنگ ڈیسک) یورپی کمیشن کی صدر ارسولا وان ڈیر لاین نے یورپی پارلیمنٹ میں سالانہ خطاب کے دوران یورپی سکیورٹی کونسل کے قیام کی تجویز پیش کردی۔ مجوزہ فورم میں یورپی یونین کے ساتھ برطانیہ، ناروے، یوکرین، کینیڈا اور دیگر شراکت دار ممالک کو شامل کرنے کی تجویز ہے۔وان ڈیر لاین کے مطابق سائبر حملوں، تخریب کاری، آتش زنی اور ڈرونز کی دراندازی سمیت نئے سکیورٹی خطرات میں اضافہ ہورہا ہے، اس لیے یورپی ممالک کو مشترکہ طور پر ان خطرات کا مقابلہ کرنے کیلئے اپنی صلاحیت مضبوط کرنا ہوگی۔انہوں نے ہائبرڈ خطرات سے نمٹنے کے لائحہ عمل اور ہنگامی سکیورٹی طریقہ کار کی تجویز بھی دی۔ اس کے تحت کسی رکن ملک کو سنگین ہائبرڈ خطرے کا سامنا ہونے کی صورت میں دیگر یورپی ممالک مشترکہ ردعمل کیلئے مشاورت کرسکیں گے۔ یہ طریقہ کار نیٹو کے آرٹیکل 4 سے مماثلت رکھے گا، تاہم یورپی یونین کے اپنے نظام کے تحت کام کرے گا۔یورپی کمیشن کی صدر نے کہا کہ یورپ کو اپنی سلامتی کی ذمہ داری زیادہ مؤثر انداز میں خود سنبھالنے کی ضرورت ہے، تاہم نیٹو کے ساتھ تعاون بھی برقرار رہنا چاہیے۔ ان تجاویز کا مقصد یورپ کے موجودہ سکیورٹی نظام کو بدلتے ہوئے خطرات کے مطابق مؤثر بنانا ہے۔تجزیہ کاروں نے مجوزہ کونسل کے عملی طریقہ کار، اختیارات اور نیٹو کے موجودہ نظام سے اس کے تعلق پر سوالات اٹھائے ہیں۔ یورپی کمیشن نے تاحال نئی کونسل کی مکمل ساخت اور اختیارات کی تفصیلات جاری نہیں کیں۔