پیرس کے نواحی علاقے میں فائرنگ، ایک شخص ہلاک، 12 سالہ بچی سمیت پانچ زخمی

پیرس( مانیٹرنگ ڈیسک) فرانس کے دارالحکومت پیرس کے نواحی علاقے ٹراپ میں فائرنگ کے واقعے میں ایک شخص ہلاک جبکہ 12 سالہ بچی سمیت پانچ افراد زخمی ہوگئے۔فرانسیسی صدر ایمانوئل میکرون نے واقعے کو ’’دہشت گردانہ اور نسل پرستانہ‘‘ حملہ قرار دیا ہے۔خبر رساں ادارے کے مطابق حملہ آور نے خودکار ہتھیار سے ایک پیٹرول پمپ، طبی مرکز اور بچوں کے کھیلنے کے میدان کو نشانہ بنایا۔حکام نے بتایا کہ فائرنگ کے واقعے میں ملوث ہونے کے شبے میں 39 سالہ شخص کو گرفتار کرلیا گیا ہے، جس کی شناخت کیون ٹی کے نام سے ظاہر کی گئی ہے۔فرانس میں فوجداری تحقیقات کے دوران مشتبہ افراد کے خاندانی نام ظاہر نہ کرنا قانون نافذ کرنے والے اداروں کا معمول ہے۔یہ واقعہ ایسے وقت پیش آیا ہے جب فرانس میں سیاسی اور سماجی کشیدگی پائی جاتی ہے۔ گزشتہ ہفتے ہفتے کے روز ملک گیر احتجاج کے دوران بعض مقامات پر تشدد کے واقعات پیش آئے تھے، جبکہ رواں ہفتے کے اختتام پر مزید مظاہروں کا اعلان بھی کیا گیا ہے۔