خانکندی میں سماجی خدمات کے شعبے میں مصنوعی ذہانت کے استعمال پر بین الاقوامی فورم کا انعقاد

خانکندی( تر کیہ خبر) آذربائیجان کی وزارتِ محنت و سماجی تحفظ کے ماتحت ڈوسٹ ایجنسی کے زیرِ اہتمام خانکندی شہر میں ’’SOCGOV 2026: اسمارٹ گورننس کے لیے ڈیجیٹل تجزیہ‘‘ کے عنوان سے بین الاقوامی فورم منعقد ہوا۔آذربائیجان کی خبر رساں ایجنسی AZƏRTAC کے مطابق فورم میں مختلف ممالک کے حکومتی عہدیداروں اور مقامی و بین الاقوامی ماہرین نے شرکت کی۔ اجلاس کا مقصد سماجی خدمات میں مصنوعی ذہانت اور ڈیجیٹل تجزیے کے استعمال کے امکانات کا جائزہ لینا، شہریوں اور حکومت کے درمیان تعلقات کو مزید آسان، تیز رفتار اور شفاف بنانے کے لیے جدید حل تلاش کرنا اور اسمارٹ گورننس کے حوالے سے بہترین عالمی تجربات کا تبادلہ کرنا تھا۔تقریب کے دوران ڈوسٹ ایجنسی کے مصنوعی ذہانت پر مبنی نظام SAİDA (Social Artificial Intelligence DOST Agency) نے ناظم کے طور پر شرکا کا خیرمقدم کیا۔فورم کی افتتاحی تقریب سے خطاب کرتے ہوئے آذربائیجان کے وزیرِ محنت و سماجی تحفظ انار علیئیف نے کہا کہ یہ تقریب وطن جنگ میں آذربائیجانی فوج کی شاندار فتح کی چھٹی سالگرہ کے موقع پر منعقد کی جا رہی ہے۔ انہوں نے صدر اور سپریم کمانڈر اِن چیف الہام علیئیف کی قیادت میں حاصل ہونے والی اس کامیابی کا ذکر کرتے ہوئے شہدا کے اہلِ خانہ اور جنگ میں شریک افراد کے لیے جاری سماجی معاونت کے اقدامات پر بھی روشنی ڈالی۔انار علیئیف کے مطابق خانکندی میں ’’SOCGOV 2026‘‘ کا انعقاد علامتی اہمیت رکھتا ہے، کیونکہ اس سے آزاد کرائے گئے علاقوں میں تعمیر ہونے والی نئی زندگی اور اسمارٹ سٹی کے تصور کو اجاگر کرنے کا موقع ملا ہے۔انہوں نے بتایا کہ آذربائیجان میں 2018 سے اب تک سماجی اصلاحات کے پانچ پیکیج نافذ کیے جا چکے ہیں، جن کے تحت سالانہ اضافی مالی وسائل کا حجم 8 ارب منات ہے۔ ان اصلاحات کے نتیجے میں سماجی ادائیگیوں میں نمایاں اضافہ ہوا ہے۔وزیرِ محنت نے مزید کہا کہ صدر الہام علیئیف کی ہدایات کے مطابق سماجی ادائیگیوں میں مزید اضافے کے لیے چھٹے سماجی اصلاحاتی پیکیج کی تیاری جاری ہے۔