نیپال، تبت سیلاب: 1301 ہلاک، 5339 لاپتا

کھٹمنڈو( مانیٹرنگ ڈیسک) نیپال اور تبت میں نو روز قبل آنے والے تباہ کن اچانک سیلاب کے بعد ہلاکتوں اور لاپتا افراد کی تعداد میں مسلسل اضافہ ہو رہا ہے۔ مجموعی طور پر 1301 افراد ہلاک جبکہ 5339 افراد تاحال لاپتا ہیں۔نیپالی پولیس کے مطابق ملک میں ہلاکتوں کی تعداد 1280 تک پہنچ گئی ہے جبکہ 4798 افراد کا ابھی تک کوئی سراغ نہیں مل سکا۔ دوسری جانب تبت کے حکام نے بتایا ہے کہ وہاں 21 افراد ہلاک اور 541 لاپتا ہیں۔حکام کے مطابق لاپتا افراد میں کم از کم 34 ممالک کے سینکڑوں غیر ملکی شہری بھی شامل ہیں، جس کے باعث یہ سانحہ عالمی توجہ کا مرکز بن گیا ہے۔نیپال میں امدادی سرگرمیاں جاری ہیں اور مختلف بجلی گھروں کی کم از کم چھ سرنگوں میں امدادی کارروائیاں کی جا رہی ہیں، جہاں 150 سے زائد افراد کے پھنسے ہونے کا خدشہ ہے۔امدادی ٹیمیں لاپتا افراد کی تلاش اور ممکنہ زندہ بچ جانے والوں کو نکالنے کے لیے بھرپور کوششیں کر رہی ہیں۔ تریشولی تھری اے بجلی گھر کی سرنگ سے نو روز بعد دو کارکنوں کو زندہ نکال لیا گیا، جس سے دیگر پھنسے افراد کے اہل خانہ میں بھی امید پیدا ہوئی ہے۔وزیراعظم کے دفتر کے مطابق ریسکیو کیے گئے دو کارکنوں میں سے ایک، کبیر مہارجن، کی حالت تشویشناک ہے اور وہ کھٹمنڈو کے فوجی ہسپتال میں زیر علاج ہیں۔