لاہور( ترکیہ خبر) پنجاب میں غیر قانونی طور پر مقیم غیر ملکی باشندوں کے انخلا کا عمل جاری ہے، جبکہ پنجاب پولیس اب تک لاہور سمیت صوبے بھر سے پینتیس ہزار سے زائد افغان باشندوں اور دیگر غیر قانونی غیر ملکیوں کو واپس بھجوا چکی ہے۔پنجاب پولیس کے ترجمان کے مطابق اس وقت ایک سو تریسٹھ افراد عارضی مراکز میں موجود ہیں، جن کی قانونی کارروائی مکمل ہونے کے بعد انہیں بھی ان کے ملک روانہ کر دیا جائے گا۔پولیس حکام کا کہنا ہے کہ واپس بھجوائے جانے والوں میں تیرہ ہزار سات سو اٹھائیس مرد، سات ہزار اڑتالیس خواتین اور چودہ ہزار تین سو چھیاسٹھ بچے شامل ہیں۔اعداد و شمار کے مطابق دس ہزار آٹھ سو اٹھانوے افراد ایسے تھے جن کے پاس رہائشی دستاویزات موجود تھیں، جبکہ گیارہ ہزار ایک سو اکتیس افراد افغان شہریت کارڈ رکھتے تھے۔ اس کے علاوہ تیرہ ہزار ایک سو تیرہ غیر قانونی غیر ملکی باشندوں کو بھی واپس بھیجا گیا۔آئی جی پنجاب عبدالکریم نے صوبے بھر میں سکیورٹی مزید سخت رکھنے کی ہدایت دیتے ہوئے کہا کہ غیر قانونی طور پر مقیم تمام افراد کا انخلا ہر صورت یقینی بنایا جائے گا۔ انہوں نے کہا کہ پنجاب پولیس بین الاقوامی قوانین کے مطابق اس پالیسی پر عمل کر رہی ہے اور تمام کارروائی قانون کے دائرے میں مکمل کی جا رہی ہے۔
