اردن کا دعویٰ، فضائی دفاعی نظام نے ایران کے 8 میزائل تباہ کر دیے

عمان( مانیٹرنگ ڈیسک) اردن کی مسلح افواج نے دعویٰ کیا ہے کہ ملک کے فضائی دفاعی نظام نے ایران کی جانب سے داغے گئے 8 میزائل فضا میں ہی تباہ کر دیے، جو اردن کی فضائی حدود یا اس کی جانب بڑھ رہے تھے۔اردن کی فوج کے مطابق فضائی دفاعی یونٹس نے فوری کارروائی کرتے ہوئے تمام میزائلوں کو کامیابی سے نشانہ بنایا، جس کے نتیجے میں کسی جانی یا مالی نقصان کی اطلاع نہیں ملی۔اردنی حکام کا کہنا ہے کہ فوج اور فضائی دفاعی نظام مکمل طور پر چوکس ہیں اور ملک کی سلامتی کے تحفظ کے لیے تمام ضروری اقدامات کیے جا رہے ہیں۔یہ پیش رفت ایسے وقت میں سامنے آئی ہے جب ایرانی فوج نے دعویٰ کیا تھا کہ اس نے اردن میں موجود امریکی فوجی تنصیبات کو ڈرون حملوں کا نشانہ بنایا ہے۔ ایرانی سرکاری میڈیا کے مطابق یہ کارروائی امریکا کی جانب سے ایران پر کیے گئے تازہ حملوں کے جواب میں کی گئی۔تاہم دونوں ممالک کے دعوؤں کی آزاد ذرائع سے تاحال تصدیق نہیں ہو سکی، جبکہ خطے میں کشیدگی مسلسل بڑھ رہی ہے۔دفاعی ماہرین کے مطابق ایران اور امریکا کے درمیان جاری فوجی تناؤ کے باعث اردن، خلیجی ممالک اور آبنائے ہرمز کے گرد سکیورٹی خدشات میں اضافہ ہو رہا ہے، جس کے علاقائی امن، عالمی تجارت اور سلامتی پر بھی گہرے اثرات مرتب ہو سکتے ہیں۔