اسرائیل میں عام انتخابات 27 اکتوبر کو ہوں گے

تل ابیب(مانیٹرنگ ڈیسک) اسرائیل میں عام انتخابات 27 اکتوبر کو منعقد ہوں گے، جبکہ موجودہ پارلیمنٹ 17 جولائی کو اپنی آئینی چار سالہ مدت مکمل کر لے گی۔رپورٹس کے مطابق گزشتہ 50 برسوں میں یہ پہلی اسرائیلی حکومت ہوگی جو اپنی مدت پوری کرے گی۔ وزیراعظم بنیامین نیتن یاہو پہلے ہی آئندہ انتخابات میں حصہ لینے کا اعلان کر چکے ہیں۔پارلیمنٹ کی مدت مکمل ہونے کے بعد الیکشن حکام نے انتخابی عمل کی تیاریاں شروع کر دی ہیں، جبکہ مختلف سیاسی جماعتیں بھی اپنی انتخابی مہم کو حتمی شکل دینے میں مصروف ہیں۔ سیاسی رہنما عوامی حمایت حاصل کرنے کے لیے ملک بھر میں سرگرمیاں تیز کر رہے ہیں۔سیاسی مبصرین کا کہنا ہے کہ وزیراعظم نیتن یاہو اپنی جماعت کی کامیابی کے لیے بھرپور انتخابی مہم چلائیں گے، جبکہ اپوزیشن جماعتیں بھی انہیں سخت مقابلہ دینے کی تیاری کر رہی ہیں۔تجزیہ کاروں کے مطابق آئندہ انتخابات اسرائیل کی داخلی سیاست، معاشی پالیسیوں اور خطے کی مجموعی صورتحال پر گہرے اثرات مرتب کر سکتے ہیں۔ ان کا کہنا ہے کہ انتخابی نتائج نئی حکومت کی تشکیل کے ساتھ ساتھ مستقبل کی خارجہ اور سلامتی کی پالیسیوں کے تعین میں بھی اہم کردار ادا کریں گے۔ماہرین کے مطابق 27 اکتوبر کو ہونے والے انتخابات کو اسرائیل کی حالیہ سیاسی تاریخ کے اہم ترین انتخابی مراحل میں شمار کیا جا رہا ہے۔