گلگت بلتستان انتخابات: پیپلز پارٹی آگے، غیر حتمی نتائج کا سلسلہ جاری

گلگت( ترکیہ خبر)گلگت بلتستان میں اسمبلی انتخابات کے غیر حتمی اور غیر سرکاری نتائج کے مطابق پاکستان پیپلز پارٹی مجموعی طور پر سب سے نمایاں جماعت کے طور پر سامنے آ رہی ہے، جبکہ آزاد امیدوار بھی متعدد نشستوں پر کامیابی حاصل کرنے میں کامیاب ہوئے ہیں۔اب تک 24 میں سے 19 حلقوں کے نتائج سامنے آ چکے ہیں جن کے مطابق پیپلز پارٹی 9 نشستیں جیت چکی ہے۔ مسلم لیگ (ن) نے 3 نشستیں حاصل کی ہیں، مجلس وحدت مسلمین ایک نشست پر کامیاب ہوئی ہے، جبکہ 6 نشستوں پر آزاد امیدواروں نے کامیابی حاصل کی ہے۔حلقہ وار نتائج کے مطابق مختلف اضلاع میں سخت مقابلہ دیکھنے میں آیا۔ گلگت، اسکردو، نگر، شگر، استور، دیامر اور غذر کے حلقوں میں متعدد نشستوں پر قریبی مقابلے کے بعد فیصلے سامنے آئے۔کچھ حلقوں میں پیپلز پارٹی نے واضح برتری حاصل کی، جبکہ کئی حلقوں میں مسلم لیگ (ن) اور آزاد امیدواروں نے بھی اہم کامیابیاں حاصل کیں۔ بعض حلقوں کے نتائج ابھی مکمل نہیں ہوئے اور انتخابی عمل کا سلسلہ جاری ہے۔مجموعی رجحانات کے مطابق کسی بھی جماعت کو واضح اکثریت حاصل نہیں ہو سکی، جس کے باعث آئندہ حکومت سازی کے لیے سیاسی جوڑ توڑ اور اتحاد سازی کا عمل اہم کردار ادا کرے گا۔