برطانیہ کے تین ایئرپورٹس سائبر حملے کی زد میں، 87 لاکھ صارفین متاثر

لندن( مانیٹرنگ ڈیسک) برطانیہ کے تین بڑے ہوائی اڈے سائبر حملے کا نشانہ بن گئے، جن میں مانچسٹر، اسٹینسٹڈ اور ایسٹ مڈلینڈز ایئرپورٹس شامل ہیں۔برطانوی ذرائع ابلاغ کے مطابق حملے کے نتیجے میں 87 لاکھ صارفین کا حساس ڈیٹا چوری ہونے کا دعویٰ کیا گیا ہے۔ متاثرہ معلومات میں ای میل پتے، فون نمبرز، گاڑیوں کے اندراج کی تفصیلات اور ڈاک کے کوڈ شامل ہیں۔رپورٹس کے مطابق گاڑیوں کی پارکنگ، ہوائی اڈے کے لاؤنج اور فوری داخلے کی بکنگ سے متعلق معلومات بھی متاثر ہوئی ہیں، جبکہ ہوائی اڈوں کی وائی فائی سروس استعمال کرنے والے صارفین کا ڈیٹا بھی ہیک کیا گیا۔مانچسٹر ایئرپورٹس گروپ کے مطابق خطرے کا بروقت سراغ لگاتے ہی فوری کارروائی کرکے اسے قابو کرلیا گیا۔ ماہرین کی مدد سے صارفین اور نظام کے تحفظ کیلئے مزید ضروری اقدامات جاری ہیں۔گروپ کا کہنا ہے کہ متعلقہ حکام کو واقعے سے آگاہ کردیا گیا ہے اور ان کے تعاون سے سائبر حملے کی تحقیقات اور آئندہ کی کارروائی جاری ہے۔