صوبہ ہزارہ کا قیام وقت اور عوام کی ضرورت ہے، سردار یوسف

اسلام آباد( تر کیہ خبر)وفاقی وزیر مذہبی امور سردار محمد یوسف نے کہا ہے کہ آبادی میں اضافے اور بڑھتی ہوئی انتظامی ضروریات کے پیش نظر نئے صوبوں کا قیام وقت کی اہم ضرورت بن چکا ہے۔ ان کے مطابق صوبہ ہزارہ کا مطالبہ عوامی خواہش اور آئینی تقاضے کی حیثیت رکھتا ہے، جبکہ اسے تمام سیاسی جماعتوں کی حمایت حاصل ہے۔ضلع کچہری میں صوبہ ہزارہ تحریک کے حوالے سے خطاب کرتے ہوئے سردار محمد یوسف نے کہا کہ پاکستان کے قیام کے وقت آبادی تقریباً ساڑھے تین کروڑ تھی، جبکہ آج ملک میں اضلاع کی تعداد 160 سے تجاوز کرچکی ہے، تاہم صوبوں کی تعداد اب بھی چار ہے۔انہوں نے کہا کہ آبادی بڑھنے کے ساتھ عوامی مسائل اور انتظامی تقاضوں میں بھی اضافہ ہوا ہے، اس لیے چھوٹے انتظامی یونٹس قائم کرکے عوام کو سہولیات اور اختیارات ان کی دہلیز تک پہنچائے جاسکتے ہیں۔ ان کا کہنا تھا کہ ایسے انتظامی یونٹس بے فائدہ ہیں جہاں اختیارات نچلی سطح تک منتقل نہ کیے جائیں۔وفاقی وزیر کے مطابق ہزارہ کے آٹھ اضلاع میں صوبے کے قیام کے لیے عوامی سطح پر متعدد ریلیاں منعقد کی جاچکی ہیں اور جغرافیائی اعتبار سے بھی یہ خطہ الگ صوبے کے قیام کی صلاحیت رکھتا ہے۔ انہوں نے کہا کہ صوبہ ہزارہ کے مطالبے کی کسی سیاسی جماعت نے مخالفت نہیں کی۔سردار محمد یوسف نے بتایا کہ صوبہ ہزارہ کے قیام کے حق میں خیبرپختونخوا اسمبلی سے تین مرتبہ قرارداد منظور کرکے وفاق کو بھجوائی جاچکی ہے۔انہوں نے مزید کہا کہ ملکی سلامتی حکومت کی اولین ترجیح ہے۔ ان کے مطابق پاکستان نے حالیہ معرکے کے بعد عالمی سطح پر اپنی اہمیت منوائی ہے اور امن کے لیے اس کے کردار کو سراہا گیا ہے۔ حکومت پاکستان نے امریکا اور ایران کے درمیان جنگ روکنے کی کوششوں میں بھی کردار ادا کیا، جبکہ مکہ امن معاہدے کا مقصد عالمی امن کے فروغ میں معاونت کرنا تھا۔سردار محمد یوسف نے کہا کہ حرمین شریفین کے تحفظ کے لیے پاکستانی قوم ہر قربانی دینے کے لیے تیار ہے۔