پاکستان عالمی ڈیجیٹل مالیاتی نظام کی تشکیل میں فعال کردار ادا کرے گا: بلال بن ثاقب

 اسلام آباد( ترکیہ خبر) وزیر مملکت اور چیئرمین پاکستان ورچوئل اثاثہ جات ریگولیٹری اتھارٹی بلال بن ثاقب نے کہا ہے کہ عالمی مالیاتی نظام کی نئی تشکیل کے عمل میں پاکستان بھی ضابطہ سازی میں شریک ہوگا۔سوئٹزرلینڈ کے شہر زیورخ میں منعقدہ عالمی فورم سے خطاب کرتے ہوئے انہوں نے کہا کہ دنیا کے مالیاتی قواعد دوبارہ مرتب کیے جا رہے ہیں اور پاکستان اس نئے عالمی مالیاتی نظام کی تشکیل میں فعال کردار ادا کرے گا۔بلال بن ثاقب نے کہا کہ مالیاتی نظام تیزی سے سافٹ ویئر، بلاک چین اور ڈیجیٹل ٹیکنالوجی کے ذریعے خودکار ہو رہا ہے، اور سرحدیں اس تبدیلی کو روک نہیں سکتیں۔انہوں نے کہا کہ اب سوال یہ نہیں رہا کہ ڈیجیٹل اثاثوں کو اجازت دی جائے یا نہیں، بلکہ اصل بحث ان کی بڑھتی ہوئی اہمیت اور مؤثر ضابطہ بندی ہے۔ان کے مطابق پاکستان ٹوکنائزڈ فنانس کے قواعد بنانے والے ممالک میں شامل ہوگا، اور ابھرتی ہوئی معیشتوں کو چاہیے کہ وہ مالی مستقبل کے اصول خود تشکیل دیں، نہ کہ صرف ان پر عمل کریں۔