اسلام آباد( ترکیہ خبر)اسلام آباد میں وفاقی وزیر قانون و انصاف اعظم نذیر تارڑ نے کہا ہے کہ حکومت کی کفایت شعاری مہم کے تحت وفاقی وزرا کے ماہانہ پٹرول کوٹے میں نمایاں کمی کر دی گئی ہے۔اپنے بیان میں انہوں نے بتایا کہ وفاقی وزرا کے لیے ماہانہ پٹرول کی مقدار 400 لٹر سے کم کر کے 200 لٹر مقرر کر دی گئی ہے۔اعظم نذیر تارڑ کے مطابق حکومت اخراجات میں کمی اور مالی نظم و ضبط کے فروغ کے لیے مختلف اقدامات پر عمل پیرا ہے، جس کے نتیجے میں وزرا کی مراعات اور سہولتوں میں بھی نمایاں کمی کی گئی ہے۔انہوں نے کہا کہ موجودہ پالیسی کے تحت وفاقی وزرا کے لیے اضافی مراعات کی گنجائش نہ ہونے کے برابر رہ گئی ہے، تاہم اگر 200 لٹر ماہانہ پٹرول کوٹے کے حوالے سے بھی کوئی اعتراض ہو تو اس پر مزید غور کیا جا سکتا ہے۔وفاقی وزیر قانون نے کہا کہ قومی وسائل کے مؤثر استعمال اور غیر ضروری اخراجات کے خاتمے کے لیے مختلف وزارتوں اور سرکاری اداروں میں کفایت شعاری اقدامات پر عمل درآمد جاری ہے۔انہوں نے مزید کہا کہ حکومتی اخراجات میں کمی سے قومی خزانے پر بوجھ کم ہوگا اور مالی نظم و ضبط کو مزید مضبوط بنانے میں مدد ملے گی۔ ان کے بقول حکومت پہلے ہی اعلیٰ حکام اور وزرا کو حاصل متعدد سہولتوں میں کمی کر چکی ہے اور آئندہ بھی مزید اقدامات کا جائزہ لیا جائے گا۔
