تمام سیاسی قوتیں کامیابی اور ناکامی دونوں کو تسلیم کرنے کی روایت کو فروغ دیں: اختیار ولی خان

اسلام آباد( تر کیہ خبر)وزیراعظم کے کوآرڈینیٹر اختیار ولی خان نے کہا ہے کہ انتخابات میں کامیابی اور شکست کو جمہوری روایات کے مطابق کھلے دل سے قبول کرنا چاہیے۔انہوں نے کہا کہ سیاسی جماعتوں کو شکست کی صورت میں اپنے مخالفین کو مبارکباد دینے کا حوصلہ پیدا کرنا چاہیے۔ ان کا کہنا تھا کہ ماضی میں بھی جمہوری اقدار کے تحت سیاسی جماعتوں نے ایک دوسرے کے مینڈیٹ کا احترام کیا، جیسے گلگت بلتستان انتخابات میں پاکستان پیپلز پارٹی کی کامیابی پر پاکستان مسلم لیگ (ن) نے اسے مبارکباد دی تھی۔اختیار ولی خان نے زور دیا کہ تمام سیاسی قوتیں کامیابی اور ناکامی دونوں کو تسلیم کرنے کی روایت کو فروغ دیں تاکہ جمہوری نظام مزید مضبوط ہو۔آزاد جموں و کشمیر کے انتخابات سے متعلق سوال پر انہوں نے دعویٰ کیا کہ ان کی معلومات کے مطابق پاکستان مسلم لیگ (ن) تمام انتخابی حلقوں میں برتری حاصل کیے ہوئے ہے۔انہوں نے کہا کہ شفاف انتخابی عمل اور جمہوری استحکام کے لیے ضروری ہے کہ تمام سیاسی جماعتیں عوامی فیصلے کا احترام کریں اور انتخابی نتائج کو خوش اسلوبی سے قبول کریں۔