کولمبیا میں 7.4 شدت کا زلزلہ، 164 افراد ہلاک، 570 زخمی

بوگوٹا( مانیٹرنگ ڈیسک) کولمبیا میں 7.4 شدت کے طاقتور زلزلے نے بڑے پیمانے پر تباہی مچادی، جس کے نتیجے میں کم از کم 164 افراد ہلاک اور 570 سے زائد زخمی ہوگئے۔ حکام نے اسے گزشتہ 10 برس کے دوران ملک میں آنے والا شدید ترین زلزلہ قرار دیا ہے۔کولمبیا کی ایسوسی ایشن آف کیپیٹل سٹیز کے مطابق زلزلے کے باعث ہلاکتوں کی تعداد 164 ہوگئی جبکہ 570 افراد زخمی ہوئے ہیں۔ حکام نے خدشہ ظاہر کیا ہے کہ ملبے سے مزید لاشیں اور زخمی برآمد ہونے کے باعث ہلاکتوں کی تعداد بڑھ سکتی ہے۔زلزلے کا مرکز مغربی کولمبیا کے علاقے سان خوسے ڈیل پالمار میں بتایا گیا ہے، جو دارالحکومت بوگوٹا سے تقریباً 150 میل مغرب میں واقع ہے۔ زلزلے کے شدید جھٹکوں سے علاقے میں متعدد عمارتیں متاثر ہوئیں اور کئی عمارتیں منہدم ہوگئیں۔ متاثرہ عمارتوں میں ایک اسپتال کے بچوں اور نومولود بچوں کے شعبے بھی شامل ہیں۔امدادی کارکن ملبے تلے دبے افراد کی تلاش اور انہیں زندہ نکالنے کے لیے کارروائیوں میں مصروف ہیں، جبکہ فوجی اہلکاروں کو بھی امدادی سرگرمیوں میں شامل کرلیا گیا ہے۔کولمبیا کی حکومت نے زلزلے کے بعد ملک میں قومی آفت کا اعلان کردیا۔ متاثرہ علاقوں میں زخمیوں کو طبی امداد کی فراہمی، ریسکیو کارروائیوں اور بے گھر افراد کے لیے ضروری انتظامات کیے جارہے ہیں۔زلزلے کے جھٹکے دارالحکومت بوگوٹا میں بھی محسوس کیے گئے، جہاں خوف و ہراس کے باعث متعدد شہری عمارتوں سے نکل کر سڑکوں پر آگئے۔ شہر کے مختلف مقامات پر ہنگامی الارم بھی بج اٹھے اور شہریوں نے محفوظ مقامات کا رخ کیا۔