اداکارہ نویا نائر کو گجرے لے جانے پر آسٹریلیا میں بھاری جرمانہ

نئی دہلی…جنوبی بھارتی اداکارہ نویا نائر نے میلبرن ایئرپورٹ پر پیش آنے والے واقعے پر ردعمل دے دیا ہے۔ حال ہی میں انہیں اس وقت روکا گیا تھا جب ان کے بیگ سے جیسمین کے گجرے برآمد ہوئے، جن پر آسٹریلوی قوانین کے تحت سخت پابندی ہے۔بھارتی میڈیا کو دیے گئے انٹرویو میں نویا نائر نے بتایا کہ وہ ایک شادی میں شرکت کے لیے آسٹریلیا جا رہی تھیں اور انہیں معلوم نہیں تھا کہ وہاں پھول لے جانا ممنوع ہے۔ ان کا کہنا تھا کہ ائیرپورٹ پر اسنفر کتے کی نشاندہی کے بعد بیگ کی تلاشی لی گئی جس میں گجرے ملے۔ کچھ گجرے انہوں نے بالوں میں بھی لگا رکھے تھے۔اداکارہ نے کہا کہ وہ پھول اسمگل نہیں کر رہی تھیں بلکہ یہ محض نادانستہ غلطی تھی۔ ان کے مطابق حکام نے 1980 آسٹریلوی ڈالر (تقریبا ایک لاکھ 14 ہزار بھارتی روپے) جرمانہ عائد کیا، جبکہ عام طور پر ایسے معاملات میں 300 ڈالر تک چارج کیے جاتے ہیں۔نویا نائر نے مزید کہا کہ ایک غیر ملکی ہونے کے ناطے انہیں اندازہ نہیں تھا کہ گجروں پر بھی بھاری جرمانہ لگ سکتا ہے۔ انہوں نے حکام سے درخواست کی ہے کہ جرمانے کی رقم پر نظرثانی کی جائے۔