آئی ایم ایف سے نئی قسط کیلئے مذاکرات 25 ستمبر سے شروع ہو نے کاامکان

اسلام آباد…پاکستان اور بین الاقوامی مالیاتی فنڈ (آئی ایم ایف) کے درمیان ایک ارب ڈالر کی نئی قسط کے حصول کے لیے مذاکرات رواں ماہ کے آخری عشرے میں ہوں گے۔ اس سلسلے میں آئی ایم ایف کا وفد 25 ستمبر کو پاکستان پہنچے گا۔وزارتِ خزانہ کے ذرائع کے مطابق دوسرے اقتصادی جائزے پر مذاکرات کی تیاری کی جا رہی ہے اور ملکی معاشی اعداد و شمار کو حتمی شکل دے کر جلد آئی ایم ایف کے ساتھ شیئر کیا جائے گا۔ مذاکرات کامیاب ہونے کی صورت میں آئی ایم ایف بورڈ کی منظوری کے بعد پاکستان کو ایک ارب ڈالر کی اگلی قسط جاری ہونے کا امکان ہے۔واضح رہے کہ یہ مذاکرات 7 ارب ڈالر کے ایکسٹینڈڈ فنڈ فیسلٹی پروگرام کے تحت ہوں گے، جو ستمبر 2024 میں طے پایا تھا۔ اس پروگرام کے تحت اب تک پاکستان کو 2 اقساط میں 2 ارب ڈالر سے زائد فنڈز مل چکے ہیں۔اس کے علاوہ پاکستان اور آئی ایم ایف کے درمیان کلائمیٹ فنانسنگ کا معاہدہ بھی طے پا چکا ہے، جس کے تحت 28 ماہ میں ایک ارب 30 کروڑ ڈالر فراہم کیے جائیں گے۔