سعودی ولی عہد کی اسرائیلی حملوں پر شدید مذمت، فوری اقدام کا مطالبہ

ریاض… سعودی ولی عہد محمد بن سلمان نے دوحہ پر اسرائیلی حملوں کی سخت مذمت کرتے ہوئے کہا ہے کہ اس قسم کی جارحیت کو روکنے کے لیے فوری اقدامات ناگزیر ہیں۔مجلس شوری کونسل کے سالانہ اجلاس سے خطاب میں انہوں نے واضح کیا کہ سعودی عرب قطر کے ہر اقدام میں اس کے شانہ بشانہ کھڑا ہے۔ ان کا کہنا تھا کہ غزہ فلسطینی سرزمین ہے اور کوئی بھی طاقت فلسطینی عوام کو ان کے جائز حقوق سے محروم نہیں کر سکتی۔دوسری جانب متحدہ عرب امارات کے صدر شیخ محمد بن زاید النہیان اظہارِ یکجہتی کے لیے دوحہ پہنچے، جہاں امیر قطر شیخ تمیم بن حمد الثانی نے ائیرپورٹ پر ان کا استقبال کیا۔قطر کے وزیراعظم نے اسرائیلی حملے کو ریاستی دہشت گردی قرار دیتے ہوئے کہا کہ اس اقدام نے یرغمالیوں کی رہائی کی تمام امیدیں ختم کر دی ہیں۔ انہوں نے مطالبہ کیا کہ اسرائیلی وزیراعظم نیتن یاہو کو انصاف کے کٹہرے میں لایا جائے۔ادھر مصر کے صدر عبدالفتاح السیسی اور اردن کے شاہ عبداللہ دوم نے بھی قطر کے ساتھ مکمل یکجہتی کا اعلان کیا۔واضح رہے کہ ایک روز قبل اسرائیل نے دوحہ میں حماس قیادت کو نشانہ بنانے کی کوشش کی تھی، تاہم حماس کی مرکزی قیادت محفوظ رہی۔ حملے میں خلیل الحیا کے بیٹے سمیت 6 افراد جاں بحق ہوئے۔