آبنائے ہرمز کی صفائی میں 6 ماہ لگ سکتے ہیں، امریکی محکمہ دفاع

واشنگٹن( مانیٹرنگ ڈیسک) امریکی محکمۂ دفاع پینٹاگون کے مطابق آبنائے ہرمز سے سمندری بارودی سرنگوں کی صفائی میں تقریباً چھ ماہ کا وقت لگ سکتا ہے۔بین الاقوامی میڈیا رپورٹ کے مطابق پینٹاگون حکام نے ایک خفیہ اجلاس میں آبنائے ہرمز کی صورتحال پر قانون سازوں کو بریفنگ دی، جس میں جنگی اخراجات، حکمت عملی اور مقاصد سے متعلق تفصیلی وضاحت فراہم نہیں کی جا سکی۔اجلاس کے بعد اراکین نے کہا کہ انہیں جوابات سے زیادہ سوالات کا سامنا کرنا پڑا، جبکہ بعض حساس عسکری معاملات پر بھی واضح مؤقف سامنے نہیں آ سکا۔رپورٹ کے مطابق بریفنگ میں ماضی کے ایک واقعے کا بھی ذکر ہوا جس میں ایک تعلیمی ادارے پر حملے کے دوران درجنوں افراد جاں بحق ہوئے تھے، تاہم اس حوالے سے بھی تفصیلی وضاحت فراہم نہیں کی گئی۔واضح رہے کہ آبنائے ہرمز عالمی تجارت کے لیے ایک نہایت اہم سمندری گزرگاہ ہے اور اس میں کسی بھی قسم کی کشیدگی عالمی معیشت اور توانائی کی ترسیل پر براہ راست اثر انداز ہو سکتی ہے۔