تل ابیب(ترک خبر)امریکہ اپنے اتحادی ممالک کے ساتھ مل کر غزہ کی پٹی کی تعمیر نو کے لیے ایک بین الاقوامی کانفرنس کے انعقاد پر سنجیدگی سے غور کر رہا ہے۔ غیر ملکی میڈیا کے مطابق یہ پیش رفت اسرائیل اور حماس کے درمیان مذاکرات میں حالیہ تعطل کے بعد جنگ بندی کی کوششوں کو دوبارہ متحرک کرنے کے لیے کی جا رہی ہے۔ذرائع کا کہنا ہے کہ امریکی دارالحکومت واشنگٹن کو کانفرنس کے ممکنہ مقام کے طور پر دیکھا جا رہا ہے، جبکہ اس کے انعقاد کی تاریخ آئندہ سال جنوری 2026 کے اوائل میں متوقع ہے۔ اس سلسلے میں ہونے والی مشاورت میں مصر سمیت متعدد عرب اور علاقائی ممالک شریک ہیں۔ذرائع کے مطابق مصر اس پورے عمل میں ایک اہم شراکت دار کے طور پر مرکزی کردار ادا کر رہا ہے، جو نہ صرف امن کی کوششوں بلکہ تعمیر نو اور فریقین کے درمیان رابطوں کو آسان بنانے میں بھی سرگرم ہے۔اطلاعات کے مطابق اس مجوزہ کانفرنس کا مقصد جنگ کے خاتمے کے بعد غزہ کی بحالی سے متعلق امریکی منصوبے کے دوسرے مرحلے کو عملی شکل دینا ہے، جس میں تباہ شدہ بنیادی ڈھانچے کی دوبارہ تعمیر پر توجہ دی جائے گی۔یہ پیش رفت قطر کے دارالحکومت دوحہ میں جاری حالیہ مشاورت کے ساتھ بھی جڑی ہوئی ہے، جہاں غزہ میں ایک بین الاقوامی استحکام فورس کی ممکنہ تعیناتی پر غور کیا گیا۔ اس فورس کا مقصد سکیورٹی صورتحال کو بہتر بنانا، امدادی سرگرمیوں کو ممکن بنانا اور ترقیاتی منصوبوں کا آغاز کرنا ہے۔ذرائع نے مزید بتایا کہ مجوزہ امن کونسل تعمیر نو کے لیے مختص فنڈز اور ترقیاتی ٹھیکوں کی نگرانی کرے گی، جس میں عالمی ٹیکنالوجی اور لاجسٹکس کمپنیوں کی شمولیت پر بھی غور کیا جا رہا ہے۔یہ تمام کوششیں ایک ایسے وقت میں سامنے آ رہی ہیں جب غزہ میں جاری جنگ بندی کو مسلسل چیلنجز درپیش ہیں اور عبوری انتظامی معاملات پر بھی اختلافات برقرار ہیں۔ امریکی حکام کا ماننا ہے کہ تعمیر نو اور روزگار کے مواقع خطے میں معاشی سرگرمیوں کو فروغ دے کر طویل مدتی امن کی بنیاد رکھ سکتے ہیں۔
امریکہ غزہ کی تعمیر نو کیلئے بڑی عالمی کانفرنس پر غور
3 ماہ قبل
