استنبول ایئرپورٹ پر چوتھا رن وے آئندہ جمعرات سے فعال ہوگا

انقرہ، استنبول ( تر کیہ خبر) ترکیہ کے وزیر ٹرانسپورٹ و انفراسٹرکچر عبدالقادر اورال اوغلو نے کہا ہے کہ استنبول ایئرپورٹ کا مشرق سے مغرب کی سمت تعمیر کیا گیا چوتھا مرکزی رن وے جمعرات کو فعال کردیا جائے گا، جس کے بعد ایئرپورٹ پر لینڈنگ کیلئے رن ویز کی مجموعی تعداد 6 ہوجائے گی۔وزیر کے مطابق ترک صدر رجب طیب اردوان نئے رن وے کی افتتاحی تقریب میں شرکت کریں گے۔ کنکریٹ سے تعمیر شدہ یہ رن وے 2 ہزار 820 میٹر طویل اور 45 میٹر چوڑا ہے اور ایئرپورٹ کا پہلا مشرق مغرب سمت میں قائم رن وے ہے۔عبدالقادر اورال اوغلو نے بتایا کہ نیا رن وے خصوصاً اندرونِ ملک پروازوں اور مشرقی سمت جانے والی پروازوں کیلئے ٹیکسی اور طیاروں کی واپسی میں لگنے والا وقت کم کرے گا، جس سے ایندھن اور وقت کی بچت کے ساتھ خراب موسم میں بھی ہوائی اڈے کی عملی لچک اور پروازوں کی بروقت روانگی کی شرح بہتر ہوگی۔انہوں نے کہا کہ نئے مشرق مغرب رن وے کے موجودہ ہینگرز کے قریب ہونے کے باعث عمومی ہوا بازی کی سرگرمیاں معمول کی تجارتی پروازوں سے متاثر ہوئے بغیر زیادہ تیزی سے انجام دی جاسکیں گی۔