امریکی کانگریس اراکین کا اسرائیلی جوہری پروگرام پر شفافیت کا مطالبہ، حکومت پر دباؤ میں اضافہ

واشنگٹن( مانیٹرنگ ڈیسک) امریکا میں حکمران جماعت ڈیموکریٹک پارٹی کے اراکین نے اسرائیل کے مبینہ جوہری پروگرام سے متعلق پالیسی میں شفافیت لانے کا مطالبہ کرتے ہوئے امریکی حکومت پر دباؤ بڑھا دیا ہے۔تفصیلات کے مطابق 30 ڈیموکریٹ اراکینِ کانگریس نے امریکی وزیر خارجہ مارکو روبیو کو ایک خط ارسال کیا ہے، جس میں کہا گیا ہے کہ اسرائیل کے جوہری پروگرام کے حوالے سے طویل عرصے سے جاری “ابہام کی پالیسی” کو ختم کیا جائے۔خط میں مؤقف اختیار کیا گیا ہے کہ امریکا ایک ایسے ملک کی حمایت کر رہا ہے جس کے ممکنہ جوہری پروگرام کو باضابطہ طور پر تسلیم نہیں کیا جاتا، جس کے باعث عالمی سطح پر شکوک و شبہات میں اضافہ ہو رہا ہے۔کانگریس اراکین نے مؤقف اپنایا کہ اس پالیسی کے نتیجے میں مشرق وسطیٰ میں جوہری عدم پھیلاؤ کی کوششیں متاثر ہو رہی ہیں اور خطے میں کشیدگی مزید بڑھ سکتی ہے۔انہوں نے زور دیا کہ امریکی کانگریس کی آئینی ذمہ داری ہے کہ وہ اس نوعیت کے معاملات پر مکمل معلومات حاصل کرے اور عوام کو بھی آگاہ کرے۔تجزیہ کاروں کے مطابق یہ پیش رفت ایسے وقت میں سامنے آئی ہے جب مشرق وسطیٰ میں پہلے ہی کشیدگی بڑھ رہی ہے اور ایران سمیت مختلف فریقین کے درمیان تنازعات شدت اختیار کر رہے ہیں، جس سے جوہری معاملات مزید حساس ہو گئے ہیں۔