فیفا کے فیصلے پر یوئیفا کا اعتراض، کھیل کی ساکھ متاثر ہونے کا خدشہ

باکو ( سپورٹس ڈیسک)یورپی فٹبال کی گورننگ باڈی یوئیفا نے فیفا کی جانب سے امریکی کھلاڑی فولرین بالوگن کے ریڈ کارڈ کی معطلی ختم کرنے کے فیصلے پر تنقید کرتے ہوئے کہا ہے کہ اس اقدام سے کھیل کی ساکھ اور مقابلے کی شفافیت متاثر ہو سکتی ہے۔یوئیفا نے اپنے بیان میں کہا کہ بالوگن کو ملنے والے ریڈ کارڈ کے بعد ایک میچ کی خودکار معطلی کو ایک سال کے لیے مشروط طور پر روکنے کا فیصلہ "سرخ لکیر عبور کرنے" کے مترادف ہے۔یورپی ادارے کا کہنا تھا کہ ریڈ کارڈ کے بعد کم از کم ایک میچ کی لازمی معطلی فٹبال قوانین کا بنیادی حصہ ہے، یہ کسی صوابدیدی اختیار کا معاملہ نہیں اور نہ ہی اس میں استثنیٰ دیا جا سکتا ہے، خاص طور پر ایسے جاری ٹورنامنٹ کے دوران جہاں دیگر کھلاڑی انہی قوانین کے تحت اپنی سزائیں مکمل کر چکے ہیں۔یوئیفا نے کہا کہ جب قوانین کی یقینی حیثیت خود ان کے محافظوں کی جانب سے برقرار نہ رکھی جائے تو کھیل کی سالمیت متاثر ہوتی ہے اور کسی بھی مقابلے کی ساکھ کو نقصان پہنچتا ہے۔ادارے نے مزید کہا کہ اس فیصلے سے جاری ورلڈ کپ میں ایک مثال قائم ہو گئی ہے، جس کے بعد اسی نوعیت کے دیگر معاملات میں بھی یکساں سلوک کا مطالبہ کیا جائے گا، جس سے مقابلے کے معیار پر اثر پڑ سکتا ہے۔یوئیفا کے مطابق فٹبال کو عالمی سطح پر اس لیے اعتماد حاصل ہے کیونکہ یہ ہر جگہ ایک جیسے قوانین کے تحت کھیلا جاتا ہے۔ ادارے نے کہا کہ ورلڈ کپ جیسے بڑے مقابلے پورے کھیل پر مثبت یا منفی اثرات مرتب کرنے کی صلاحیت رکھتے ہیں۔