ترکیہ میں چھ ماہ کے دوران اسٹارٹ اپس کو 172 ملین ڈالر کی سرمایہ کاری

انقرہ( ویب ڈیسک) ترکیہ میں سال 2026 کی پہلی ششماہی کے دوران اسٹارٹ اپ کمپنیوں میں مجموعی طور پر 172 ملین ڈالر کی سرمایہ کاری کی گئی، جو 87 مختلف سرمایہ کاری معاہدوں کے ذریعے فراہم کی گئی۔یہ اعداد و شمار اسٹارٹ اپ شعبے پر نظر رکھنے والے ادارے اسٹارٹ اپس واچ کی نئی رپورٹ میں سامنے آئے، جسے 2026 کی دوسری سہ ماہی سے متعلق تقریب کے دوران پیش کیا گیا۔ اس موقع پر صنعت سے وابستہ ماہرین نے مارکیٹ کے موجودہ رجحانات اور ترکیہ میں وینچر کیپیٹل کے مستقبل پر بھی تبادلہ خیال کیا۔رپورٹ کے مطابق ملک کے گیمنگ شعبے نے سرمایہ کاروں کی خصوصی توجہ حاصل کی، جبکہ دیگر شعبوں کو ترقی کے لیے سرمایہ حاصل کرنے میں نسبتاً مشکلات کا سامنا رہا۔اعداد و شمار کے مطابق صرف چھ اسٹارٹ اپ کمپنیوں نے مجموعی سرمایہ کاری کا تقریباً 75 فیصد حصہ حاصل کیا۔ ان میں گرینڈ گیمز، ٹیل مونسٹر گیمز، فِمپل، لوسیڈا، ڈیٹا رائیڈ اور برکس شامل ہیں۔ماہرین کے مطابق یہ رجحان ظاہر کرتا ہے کہ ترکیہ کا گیمنگ اور ٹیکنالوجی کا شعبہ سرمایہ کاروں کے لیے بدستور پرکشش ہے، جبکہ دیگر شعبوں میں سرمایہ کاری بڑھانے کے لیے مزید اقدامات کی ضرورت ہے۔