افریقہ میں سائبر جرائم کا نیا خطرہ، 55 فیصد حملوں میں مصنوعی ذہانت کا استعمال

استنبول( ویب ڈیسک) انٹرپول کی ایک رپورٹ کے مطابق افریقہ میں رپورٹ ہونے والے 55 فیصد سائبر جرائم میں مصنوعی ذہانت (اے آئی) کا استعمال کیا گیا۔انٹرنیشنل کریمنل پولیس آرگنائزیشن کی افریقہ سائبر خطرات جائزہ رپورٹ 2026 میں بتایا گیا ہے کہ مصنوعی ذہانت نے سائبر حملوں کو زیادہ تیز، بڑے پیمانے پر اور اس انداز میں انجام دینا آسان بنا دیا ہے جن کا سراغ لگانا مشکل ہوتا جا رہا ہے۔رپورٹ 36 افریقی ممالک سے حاصل کیے گئے اعداد و شمار پر مبنی ہے، جس کے مطابق سائبر جرائم سے ہونے والے مالی نقصانات 2024 کے مقابلے میں دگنے سے بھی زیادہ ہو گئے، جو 19 کروڑ 20 لاکھ ڈالر سے بڑھ کر 48 کروڑ 40 لاکھ ڈالر تک پہنچ گئے۔رپورٹ کے مطابق 2025 میں افریقہ میں سب سے زیادہ رپورٹ ہونے والا سائبر جرم آن لائن فراڈ تھا۔