سام سنگ نے صحت کی نگرانی کیلئے نئے اے آئی ماڈلز متعارف کرا دیے

استنبول( ویب ڈیسک) سام سنگ ریسرچ نے مصنوعی ذہانت کے دو نئے ماڈلز متعارف کرائے ہیں، جو پہننے کے قابل آلات سے حاصل ہونے والے ڈیٹا کا تجزیہ کرکے صحت سے متعلق مختلف نمونوں کی نشاندہی کرنے کے لیے تیار کیے گئے ہیں۔کمپنی کے مطابق xMAE اور HiMAE نامی یہ ماڈلز بائیو سگنلز کا تجزیہ کریں گے، جن میں دل کی سرگرمی، جسمانی حرکت اور نیند سے متعلق ڈیٹا شامل ہے۔ یہ معلومات اسمارٹ واچز سمیت مختلف پہننے کے قابل آلات سے حاصل کی جاتی ہیں۔سام سنگ کا کہنا ہے کہ ان ماڈلز کا مقصد ہر پیمائش کو الگ الگ دیکھنے کے بجائے مختلف صحت کے سگنلز کے درمیان موجود باہمی تعلق اور نمونوں کو مصنوعی ذہانت کے ذریعے سمجھنا ہے۔یہ پیشرفت صحت کے شعبے میں مصنوعی ذہانت کے استعمال کو وسعت دینے کی سام سنگ کی کوششوں کا حصہ ہے۔ کمپنی نے جولائی میں سام سنگ ہیلتھ اسسٹنٹ کا بیٹا ورژن بھی متعارف کرایا تھا، جو صارفین کے صحت سے متعلق ڈیٹا کی مدد سے ذاتی نوعیت کی صحت اور فلاح و بہبود کی تجاویز فراہم کرتا ہے۔سام سنگ نے اپنی وسیع تر ’’کنیکٹڈ کیئر‘‘ حکمت عملی بھی پیش کی ہے، جس کا مقصد مصنوعی ذہانت اور پہننے کے قابل آلات سے حاصل ہونے والے ڈیٹا کے ذریعے زیادہ مسلسل اور ذاتی نوعیت کی صحت کی نگرانی کو ممکن بنانا ہے۔