ترکیہ میں سرمایہ کاری فنڈز کی تصفیے اور سرمایہ واپس لینے کا قانون منظور

استنبول( تر کیہ خبر) ترکیہ کی پارلیمنٹ نے بعض سرمایہ کاری فنڈز کو ختم کرنے اور ان کے پورٹ فولیو سے غیرقانونی طور پر نکالے گئے اثاثوں کی واپسی کے لیے طریقۂ کار وضع کرنے سے متعلق قانون منظور کرلیا۔قانون کا اطلاق ان سرمایہ کاری فنڈز پر ہوگا جنہیں ترکیہ کے کیپیٹل مارکیٹس بورڈ نے 17 ستمبر کو ختم کرنے کا حکم دیا تھا، تاہم قانون کی اشاعت تک ان کی تصفیے کا عمل مکمل نہیں ہوسکا تھا۔نئے قانون کے تحت فنڈز کی تصفیے کا عمل نامزد ادارے انجام دیں گے، جبکہ کیپیٹل مارکیٹس بورڈ اس کی نگرانی کرے گا۔ ضروری اخراجات منہا کرنے کے بعد حاصل ہونے والی رقم متعلقہ فنڈز کے تصفیے کے اثاثوں میں شامل کردی جائے گی۔قانون کے مطابق بورڈ کی جانب سے نامزد فنڈز کے اہل سرمایہ کاروں کو عبوری ادائیگی کے طور پر زیادہ سے زیادہ 10 لاکھ ترک لیرا، یعنی تقریباً 20 ہزار 150 ڈالر، دیے جاسکیں گے۔ ادائیگی کا تعین سرمایہ کار کی خالص سرمایہ کاری اور دیگر مقررہ شرائط کی بنیاد پر ہوگا۔جن سرمایہ کاروں کی خالص سرمایہ کاری 10 لاکھ لیرا سے کم ہے، انہیں ان کی سرمایہ کاری کی حد تک ادائیگی کی جاسکے گی، جبکہ اس سے زیادہ رقم رکھنے والے سرمایہ کاروں کے لیے عبوری ادائیگی کی زیادہ سے زیادہ حد 10 لاکھ لیرا مقرر کی گئی ہے۔قانون کے تحت اگر کیپیٹل مارکیٹس بورڈ کسی فرد یا ادارے کو متعلقہ فنڈز کے حوالے سے مخصوص نوعیت کی مارکیٹ بدعنوانی، اندرونی معلومات کی بنیاد پر تجارت یا مارکیٹ میں ہیرا پھیری میں ملوث قرار دیتا ہے تو وہ فنڈز کے تصفیے سے حاصل ہونے والے اثاثوں یا رقوم کی واپسی کے کھاتوں سے ادائیگی وصول کرنے کا اہل نہیں ہوگا۔قانون میں فنڈز قائم کرنے یا ان کا انتظام چلانے والی پورٹ فولیو مینجمنٹ کمپنیوں کو ہونے والے مالی نقصان کا بنیادی طور پر ذمہ دار قرار دیا گیا ہے۔ اگر ان کمپنیوں سے نقصان کی رقم وصول نہ ہوسکے تو مقررہ شرائط کے تحت دیگر ذمہ دار فریقوں سے بھی اس کی وصولی کی جاسکے گی۔اس کے علاوہ سیونگز ڈپازٹ انشورنس فنڈ کو اختیار دیا گیا ہے کہ وہ متعلقہ حکام کی جانب سے شناخت کیے گئے ذمہ دار فریقوں سے مالی نقصان کی تلافی کے لیے کارروائی کرے۔ اسے بعض اثاثوں پر نگران یا ٹرسٹی بھی مقرر کیا جاسکے گا۔