لیلیٰ علیئیوا کی ازبکستان میں بچوں کی فلاح سے متعلق نمائش میں شرکت

سمرقند( تر کیہ خبر) ازبکستان کے شہر سمرقند میں ’’بچوں کی فلاح میں سرمایہ کاری: آنے والی نسلوں کی پائیدار اور منصفانہ ترقی کی جانب‘‘ کے عنوان سے منعقدہ عالمی سربراہی اجلاس کے موقع پر ’’بچے کی نظر سے دنیا‘‘ کے نام سے نمائش کا اہتمام کیا گیا۔آذربائیجان کی سرکاری خبر رساں ایجنسی آذرتاج کے مطابق حیدر علیئیف فاؤنڈیشن کی نائب صدر لیلیٰ علیئیوا نے 22 اکتوبر کو نمائش کا دورہ کیا اور وہاں پیش کیے گئے مختلف حصوں کا جائزہ لیا۔یہ نمائش ازبکستان میں ماں اور بچے کی صحت کے تحفظ، تعلیم، بحالی کی خدمات، شمولیتی نظام اور بچوں کے حقوق کے تحفظ کے لیے کی جانے والی اصلاحات اور اقدامات کو اجاگر کرنے کے لیے منعقد کی گئی ہے۔نمائش 13 موضوعاتی حصوں اور انٹرایکٹو زونز پر مشتمل ہے، جن میں بچے کی پیدائش سے لے کر خودمختار زندگی شروع کرنے تک اس کی نشوونما کے مختلف مراحل پیش کیے گئے ہیں۔ ان حصوں میں ابتدائی بچپن میں صحت کا تحفظ، خاندانوں کے لیے سماجی معاونت، بحالی کی سہولتیں، شمولیتی تعلیم اور بچوں کے حقوق یقینی بنانے کے لیے جاری اقدامات کو نمایاں کیا گیا ہے۔نمائش کے دورے کے بعد لیلیٰ علیئیوا نے امام بخاری کے یادگاری مجموعے کا بھی دورہ کیا۔اس موقع پر انہیں امام محمد بن اسماعیل البخاری (810ء تا 870ء) کے علمی ورثے کے مطالعے اور اسے فروغ دینے کے لیے قائم کیے گئے جدید کمپلیکس کے بارے میں بریفنگ دی گئی۔ امام بخاری اسلامی دنیا کے ممتاز علماء اور علمِ حدیث کی نمایاں ترین شخصیات میں شمار ہوتے ہیں۔