ریڈ زون بندش ختم، اسلام آباد ہائی کورٹ بارہ روز بعد کھل گئی، سیکڑوں کیسز التوا کا شکار

اسلام آباد( ترکیہ خبر) ریڈ زون کی بندش کے باعث اسلام آباد ہائی کورٹ بارہ روز بعد دوبارہ کھل گئی ہے، جہاں عدالتی کارروائی کا سلسلہ بحال کر دیا گیا۔تفصیلات کے مطابق عدالت میں آخری بار سولہ اپریل کو کیسز کی سماعت ہوئی تھی، جس کے بعد مختلف انتظامی وجوہات کے باعث عدالتی سرگرمیاں متاثر رہیں۔ذرائع کے مطابق کفایت شعاری مہم کے تحت جمعہ کے روز جوڈیشل ورک نہ ہونے کے باعث بھی سماعتوں میں تاخیر رہی، جس کے نتیجے میں بارہ دنوں کے دوران سیکڑوں کیسز التوا کا شکار ہو گئے۔اطلاعات کے مطابق گزشتہ ہفتے ریڈ زون کی بندش کے باعث اہم مقدمات کی سماعت بھی نہیں ہو سکی، جن میں مختلف ہائی پروفائل کیسز شامل تھے۔ذرائع کا کہنا ہے کہ دو ہزار ملین پاؤنڈ کیس سمیت متعدد اہم مقدمات کی سماعت مقرر ہونے کے باوجود فہرست منسوخ کرنا پڑی۔اسی طرح اسلام آباد میں درختوں کی کٹائی سے متعلق کیس بھی عدالتی بندش کے باعث زیر سماعت نہ آ سکا، جس سے زیر التوا مقدمات کی تعداد میں مزید اضافہ ہوا۔