شمالی کوریا کا نیا بیلسٹک میزائل تجربہ، دفاعی صلاحیت بڑھانے کا اعلان

پیانگ یانگ( مانیٹرنگ ڈیسک) شمالی کوریا نے مختصر فاصلے تک مار کرنے والے جنگی بیلسٹک میزائل کا تجربہ کیا ہے، جس کے ذریعے میزائل کے ایک اہم بنیادی حصے کی کارکردگی میں بہتری کا جائزہ لیا گیا۔شمالی کوریا کے سرکاری خبر رساں ادارے کے مطابق تجربے کی مزید تفصیلات سامنے نہیں لائی گئیں، تاہم اسے میزائل نظام کی تکنیکی استعداد بڑھانے کی جانب اہم پیش رفت قرار دیا گیا ہے۔یہ تجربہ ایسے وقت میں ہوا ہے جب جنوبی کوریا کی فوج نے اطلاع دی تھی کہ شمالی کوریا نے اپنے مشرقی ساحل کے قریب سمندر کی سمت متعدد بیلسٹک میزائل داغے ہیں۔ ایک ماہ کے دوران یہ شمالی کوریا کا چوتھا میزائل تجربہ ہے۔دوسری جانب شمالی کوریا کے رہنما کم جونگ اُن نے دفاعی صنعت سے متعلق ایک عجائب گھر کا دورہ کیا اور ملک کے اسلحہ جاتی نظام کو مزید جدید بنانے کے عزم کا اظہار کیا۔ادھر امریکی صدر ڈونلڈ ٹرمپ نے اپنے دورۂ ایشیا کے دوران کم جونگ اُن سے ملاقات کے امکان کو رد نہیں کیا، جس کے بعد خطے میں ممکنہ سفارتی پیش رفت سے متعلق توقعات بڑھ گئی ہیں۔