ایمباپے نے دوسری بار گولڈن بوٹ جیت کر تاریخ رقم کردی

استنبول( سپورٹس ڈیسک) فرانس کے اسٹار فٹبالر کیلیان ایمباپے نے 2026 فیفا ورلڈ کپ میں گولڈن بوٹ ایوارڈ جیت کر نئی تاریخ رقم کردی۔ وہ دو مرتبہ یہ اعزاز حاصل کرنے والے دنیا کے پہلے کھلاڑی بن گئے ہیں۔ایمباپے نے ٹورنامنٹ میں 8 میچز کھیل کر 10 گول کیے اور سب سے زیادہ گول کرنے والے کھلاڑی قرار پائے۔ ارجنٹینا کے کپتان لیونل میسی 8 گول کے ساتھ دوسرے نمبر پر رہے۔اس سے قبل ایمباپے نے 2022 کے قطر ورلڈ کپ میں 8 گول کرکے گولڈن بوٹ حاصل کی تھی، اور اب 27 سال کی عمر میں مسلسل دوسری مرتبہ یہ ایوارڈ جیتنے والے پہلے کھلاڑی بن گئے ہیں۔ان کے 10 گولز نے انہیں 1970 میں مغربی جرمنی کے گیرڈ ملر کے بعد کسی ایک ورلڈ کپ میں 10 گول کرنے والا پہلا کھلاڑی بھی بنا دیا۔ ایک ہی ورلڈ کپ ایڈیشن میں اس سے زیادہ گول صرف فرانس کے جسٹ فونٹین نے 1958 میں 13 اور ہنگری کے شاندور کوچس نے 1954 میں 11 گول کرکے کیے تھے۔ایمباپے نے انگلینڈ کے خلاف تیسری پوزیشن کے میچ میں فرانس کی 6-4 سے شکست کے دوران دو گول کیے، جس کے بعد ورلڈ کپ تاریخ میں ان کے مجموعی گولز کی تعداد 22 ہوگئی۔ اس کے ساتھ وہ مردوں کے ورلڈ کپ میں سب سے زیادہ گول کرنے والے کھلاڑی بن گئے اور لیونل میسی کو ایک گول سے پیچھے چھوڑ دیا۔