یمن میں سعودی اتحاد کی بڑی کامیابی، حضرموت اور المہرہ میں امن بحال

عدن(مانیٹرنگ ڈیسک) یمنی صدارتی قیادت کونسل کے سربراہ ڈاکٹر رشاد العلیمی نے مشرقی یمن میں امن و استحکام کی بحالی پر سعودی عرب کی قیادت میں قائم قانونی حکومت کے حامی مشترکہ اتحاد کی کوششوں کو سراہا ہے۔ ان کا کہنا ہے کہ حضرموت اور المہرہ کے صوبوں میں تمام فوجی اور سکیورٹی ٹھکانوں کی واپسی کے بعد حالات تیزی سے معمول پر آ گئے ہیں۔رشاد العلیمی کے مطابق اتحادی قیادت کے ساتھ مربوط منصوبہ بندی کے تحت انجام دیا جانے والا کیمپ کنٹرول آپریشن توقعات سے کہیں زیادہ مہارت اور سرعت کے ساتھ مکمل کیا گیا، جس کے نتیجے میں خطے میں سماجی ہم آہنگی، امن اور استحکام کو تقویت ملی ہے۔یمن کے رقبے کے لحاظ سے سب سے بڑے صوبے حضرموت، جس کے تقریبا 30 اضلاع ہیں، میں اس پیش رفت کے بعد ایک نیا دور شروع ہو گیا ہے۔ یہاں زندگی معمول پر آ گئی ہے، جبکہ ماضی میں جنوبی عبوری کونسل کی افواج کی موجودگی کے باعث خطے میں کشیدگی دیکھی جا رہی تھی۔دوسرے ملٹری ریجن کے میڈیا سینٹر نے نخبہ حضرمیہ، حضرموت پروٹیکشن فورسز اور درع الوطن افواج کی جانب سے فوجی و سول تنصیبات کے مکمل تحفظ کی تصدیق کی ہے۔ میڈیا سینٹر نے شہریوں سے اپیل کی ہے کہ وہ امن و امان کی خاطر حساس مقامات کے قریب نہ جائیں اور کسی بھی قسم کی افواہوں سے گریز کریں۔