خیبرپختونخوا میں انتظامی اکھاڑ پچھاڑ، چھ ڈویژنوں کے کمشنر تبدیل

پشاور( تر کیہ خبر) خیبرپختونخوا کی انتظامی مشینری میں بڑے پیمانے پر ردوبدل کرتے ہوئے چھ ڈویژنوں کے کمشنروں کی نئی تعیناتیوں اور تبادلوں کا نوٹیفکیشن جاری کر دیا گیا ہے۔سرکاری اعلامیے کے مطابق کمشنر بنوں خالد محمود کو پشاور کا کمشنر مقرر کر دیا گیا ہے، جبکہ نئی ذمہ داری کے منتظر احمد علی شاہ کو کمشنر مردان تعینات کیا گیا ہے۔اسی طرح ڈیرہ اسماعیل خان کے سابق سیکرٹری سمیع اللہ کو کمشنر بنوں کی ذمہ داریاں سونپ دی گئی ہیں، جبکہ محکمہ داخلہ کے ایڈیشنل سیکرٹری شاکر اللہ کو کمشنر ہزارہ مقرر کیا گیا ہے۔اعلامیے کے مطابق وفاقی حکومت کے جوائنٹ سیکرٹری اقبال حسین کو کمشنر ملاکنڈ تعینات کرنے کے احکامات بھی جاری کیے گئے ہیں۔دوسری جانب ایڈیشنل سیکرٹری زراعت پرویز کشر کو ان کے عہدے سے ہٹا دیا گیا ہے۔ کمشنر پشاور ریاض خان محسود اور کمشنر مردان حبیب اللہ کو عہدے کے بغیر افسر مقرر کر دیا گیا ہے۔مزید برآں کمشنر ہزارہ شاہد اللہ اور کمشنر ملاکنڈ مسعود احمد کو اسٹیبلشمنٹ ڈویژن میں اپنی رپورٹ پیش کرنے کی ہدایت کی گئی ہے۔