ترک اقوام کا اتحاد سرحدوں سے بالاتر، مشترکہ تاریخ اور ثقافت مضبوط رشتہ ہے، اردوان
استنبول، انقرہ( ترکیہ خبر) ترکیہ کے صدر رجب طیب اردوان نے کہا ہے کہ ترک اقوام کے درمیان شراکت داری جغرافیائی سرحدوں تک محدود نہیں، بلکہ مشترکہ تاریخ، تہذیب اور گہرے جذباتی تعلقات پر استوار ہے۔ترک دنیا کے نوجوانوں کے اجتماع سے ویڈیو پیغام میں انہوں نے کہا کہ نقشوں پر کھینچی گئی سرحدیں ترک اقوام کے باہمی تعلقات کی وسعت کو محدود نہیں کر سکتیں۔ ان کے مطابق مشترکہ سفر کی بنیاد قدیم تاریخ، بھرپور ثقافت اور مضبوط محبت کے رشتوں پر قائم ہے۔صدر اردوان نے شرکا کو خوش آمدید کہتے ہوئے تقریب کی کامیابی کے لیے نیک خواہشات کا اظہار کیا۔ انہوں نے اس بات پر خوشی ظاہر کی کہ مئی میں نوجوانوں کی ایک نشست کے دوران ان کی جانب سے اعلان کردہ اجتماع ترکیہ کے شمال مغربی صوبے قوجہ ایلی میں منعقد ہو رہا ہے۔انہوں نے ترک دنیا کے مختلف علاقوں سے شرکت کرنے والے نوجوانوں کا خیرمقدم کیا اور ان کے ذریعے دوست اور برادر اقوام تک اپنی نیک تمنائیں اور محبت کا پیغام پہنچایا۔