آذربائیجان میں یونین خدمات کی ڈیجیٹلائزیشن کا عمل جاری

باکو (تر کیہ خبر) آذربائیجان میں ڈیجیٹلائزیشن کے اقدامات کے تحت مزدور یونینوں کے نظام میں متعدد خدمات کو برقی شکل دے دی گئی ہے جبکہ اس شعبے میں مزید کام جاری ہے۔آذرتاج کے سوال کے جواب میں آذربائیجان کنفیڈریشن آف ٹریڈ یونینز نے بتایا کہ شہریوں کی درخواستوں کی وصولی اور ان کے جوابات، دستاویزات کی گردش، فوری رابطوں اور سفری اجازت ناموں کے اجرا کا عمل ڈیجیٹل نظام کے ذریعے انجام دیا جا رہا ہے۔بیان کے مطابق صحت اور تفریحی مراکز میں ’’اسمارٹ سینیٹوریم‘‘ کا تصور بھی متعارف کرایا گیا ہے، جبکہ اعداد و شمار سے متعلق رپورٹس جمع کرنے اور ان کی تیاری کا عمل مکمل طور پر برقی بنا دیا گیا ہے۔