بیلجیم نے امریکا کو شکست دے کر ورلڈ کپ کوارٹر فائنل میں جگہ بنا لی

باکو( سپورٹس ڈیسک)بیلجیم نے پیر کو سیئٹل میں کھیلے گئے ورلڈ کپ کے راؤنڈ آف 16 مقابلے میں امریکا کو 4-1 سے شکست دے کر ٹورنامنٹ سے باہر کر دیا اور کوارٹر فائنل میں جگہ بنا لی۔اس شکست کے ساتھ مشترکہ میزبان امریکا 2002 کے بعد پہلی بار ورلڈ کپ کے آخری آٹھ مرحلے تک پہنچنے کا موقع گنوا بیٹھا۔راؤنڈ آف 16 کا یہ میچ اس وقت مزید توجہ کا مرکز بن گیا جب امریکی کھلاڑی فولرین بالوگن کو گزشتہ مرحلے میں ریڈ کارڈ ملنے کے باوجود کھیلنے کی اجازت دی گئی۔ فیفا کا یہ فیصلہ صدر ڈونلڈ ٹرمپ کی جانب سے فیفا کے صدر جیانی انفینٹینو سے معطلی پر نظرثانی کی درخواست کے بعد سامنے آیا تھا۔بیلجیم نے اس فیصلے پر تنقید کی تھی، جبکہ میچ سے قبل کچھ بیلجیئم شائقین نے احتجاجاً سرخ کارڈ لہراتے ہوئے اپنی ناراضی کا اظہار کیا۔ دوسری جانب امریکی شائقین نے کھلاڑیوں کے تعارف کے دوران بالوگن کا بھرپور استقبال کیا، تاہم وہ میچ میں کوئی نمایاں کردار ادا نہ کر سکے۔بیلجیم نے چارلس ڈی کیٹیلیرے کے گول سے برتری حاصل کی، جس کے بعد امریکا نے پہلے ہاف میں واپسی کرتے ہوئے مقابلہ برابر کر دیا۔ بالوگن کے خلاف فاؤل پر ملنے والی فری کک پر مالک ٹِل مین نے گول کر کے اسکور 1-1 کر دیا۔تاہم امریکا کی برابری صرف دو منٹ برقرار رہی اور ڈی کیٹیلیرے نے میچ کا اپنا دوسرا گول کر کے بیلجیم کو دوبارہ برتری دلا دی، جس پر امریکی کوچ موریشیو پوچیٹینو سائیڈ لائن پر خاصے پریشان دکھائی دیے۔میچ کے 57ویں منٹ میں بیلجیم نے اپنی برتری مزید بڑھا لی جب امریکی گول کیپر میٹ فریز پنالٹی ایریا سے باہر گیند کو درست انداز میں نہ سنبھال سکے اور ہانس واناکن نے خالی گول میں گیند پہنچا دی۔انجری ٹائم میں روملو لوکاکو نے امریکی دفاعی غلطی کا فائدہ اٹھاتے ہوئے بیلجیم کا چوتھا گول کر دیا اور اپنی ٹیم کی شاندار فتح یقینی بنا دی۔