آذربائیجان کے وزیراعظم کی عالمی پیرا لمپک کمیٹیوں کے عہدیداروں سے ملاقات

باکو( تر کیہ خبر) آذربائیجان کے وزیراعظم علی اسدوف نے 16 اکتوبر کو ملکی قومی پیرا لمپک کمیٹی کے قیام کی 30ویں سالگرہ کی تقریبات میں شرکت کے لیے آنے والی بین الاقوامی اور مختلف ممالک کی پیرا لمپک کمیٹیوں کے اعلیٰ عہدیداروں سے ملاقات کی۔وزیراعظم آفس کے مطابق ملاقات میں اس بات پر زور دیا گیا کہ آذربائیجان میں کھیلوں، بالخصوص پیرا لمپک تحریک کی ترقی، حکومتی پالیسی کے اہم شعبوں میں شامل ہے۔ اس موقع پر کھیلوں کے لیے قائم جدید بنیادی ڈھانچے اور بین الاقوامی سطح پر حاصل ہونے والی کامیابیوں سے بھی آگاہ کیا گیا۔اجلاس میں بتایا گیا کہ قومی پیرا لمپک کمیٹی کے 30 سالہ سفر کے دوران آذربائیجان کے پیرا لمپک کھلاڑیوں نے نمایاں کامیابیاں حاصل کی ہیں۔ملاقات میں بین الاقوامی اور قومی پیرا لمپک کمیٹیوں کے درمیان تعاون کو مزید وسعت دینے کے امور پر بھی تبادلہ خیال کیا گیا۔ اس سلسلے میں بین الاقوامی پیرا کھیلوں کے مقابلوں کو فروغ دینے، تجربات کے تبادلے اور نئے مشترکہ منصوبوں پر عمل درآمد کے امکانات کا جائزہ لیا گیا۔