باکو اجلاس میں اسرائیلی صدر کے خطاب پر 10 ممالک کا واک آؤٹ

باکو ( تر کیہ خبر) آذربائیجان کے دارالحکومت باکو میں ایشیائی ممالک کی تنظیم کانفرنس برائے ایشیا میں تعامل اور اعتماد سازی (سیکا) کے سربراہی اجلاس میں اسرائیلی صدر اسحاق ہرزوگ کے خطاب کے دوران 10 ممالک کے وفود نے احتجاجاً واک آؤٹ کیا۔عالمی میڈیا کے مطابق مرکز اطلاعات فلسطین نے بتایا کہ اسرائیلی صدر کا خطاب شروع ہوتے ہی مختلف ممالک کے نمائندوں نے اجلاس کا بائیکاٹ کیا۔ یہ اقدام غزہ میں جاری جنگ کے تناظر میں اسرائیلی عہدیدار کی شرکت پر شدید سیاسی ردعمل کی عکاسی کرتا ہے۔رپورٹ کے مطابق ترک وزیر خارجہ حاقان فیدان اور ان کا وفد اسرائیلی صدر کی تقریر شروع ہوتے ہی اپنی نشستوں سے اٹھ کر ہال سے باہر چلے گئے۔ اسی دوران دیگر متعدد ممالک کے نمائندوں نے بھی احتجاجاً اجلاس چھوڑ دیا۔سربراہی اجلاس کی میزبانی آذربائیجان بطور موجودہ صدر کررہا ہے۔ سیکا 28 ممالک پر مشتمل تنظیم ہے، جس کا مقصد ایشیائی ریاستوں کے درمیان مکالمے اور تعاون کو فروغ دینا ہے۔ اس کے رکن ممالک ایشیا کے تقریباً 90 فیصد رقبے اور دنیا کی نصف سے زیادہ آبادی کی نمائندگی کرتے ہیں۔ترکیہ سیکا کے بانی ارکان میں شامل ہے۔ اس نے 2010 میں استنبول میں تنظیم کے تیسرے سربراہی اجلاس کی میزبانی کی تھی اور 2010 سے 2014 تک تنظیم کی صدارت بھی سنبھالی تھی۔رپورٹ کے مطابق وفود کا یہ بائیکاٹ غزہ میں جاری جنگ کے حوالے سے اسرائیل پر بڑھتی ہوئی عالمی تنقید کے پس منظر میں سامنے آیا ہے۔ جنگ کے نتیجے میں ہزاروں فلسطینی شہری شہید اور زخمی ہوچکے ہیں، جبکہ مکانات، اسپتالوں، اسکولوں اور بنیادی ڈھانچے کو شدید نقصان پہنچا ہے۔ دوسری جانب انسانی امداد اور طبی سامان کی ترسیل پر بھی سخت پابندیوں کی اطلاعات ہیں۔فلسطینی علاقوں میں مبینہ بین الاقوامی جرائم کے حوالے سے عالمی عدالت انصاف اور بین الاقوامی فوجداری عدالت میں قانونی کارروائیوں کے ساتھ مختلف عالمی فورمز پر اسرائیل پر سیاسی اور قانونی دباؤ بھی بڑھ رہا ہے