ایپل کا اوپن اے آئی کے خلاف تجارتی راز چوری کرنے کا مقدمہ

 استنبول( ویب ڈیسک) امریکی ٹیکنالوجی کمپنی ایپل نے مصنوعی ذہانت کی معروف کمپنی اوپن اے آئی کے خلاف مقدمہ دائر کرتے ہوئے الزام عائد کیا ہے کہ کمپنی نے اپنے صارفین کے لیے ہارڈویئر ڈیوائس تیار کرنے کی کوشش کے دوران ایپل کے تجارتی راز حاصل کرنے کی مہم چلائی۔کیلیفورنیا کے شہر سان ہوزے کی وفاقی عدالت میں دائر کیے گئے مقدمے میں ایپل نے مؤقف اختیار کیا کہ اوپن اے آئی نے مبینہ طور پر ایپل کے ملازمین کو اپنی جانب راغب کرنے اور خفیہ معلومات حاصل کرنے کی منظم کوشش کی تاکہ اپنی نئی ہارڈویئر مصنوعات کی تیاری میں فائدہ اٹھایا جا سکے۔یہ مقدمہ دونوں کمپنیوں کے درمیان بڑھتی ہوئی کشیدگی کا واضح اظہار ہے۔ دونوں اداروں نے 2024 میں شراکت داری کے تحت چیٹ جی پی ٹی کو ایپل کی مختلف مصنوعات میں شامل کرنے کا معاہدہ کیا تھا۔تاہم بعد ازاں دونوں کمپنیوں کے تعلقات میں تناؤ پیدا ہوگیا۔ میڈیا رپورٹس کے مطابق رواں سال مئی میں اوپن اے آئی بھی ایپل کے خلاف قانونی کارروائی پر غور کر رہی تھی اور اس کا مؤقف تھا کہ ایپل نے اپنی مصنوعات میں چیٹ جی پی ٹی کے انضمام کو مناسب انداز میں فروغ نہیں دیا۔